Австралияда коронавирус оқибатида вафот этган беморлар сони бўйича кунлик антирекорд ўрнатилди. Мамлакатда бир кунда 25 киши касаллик қурбонига айланди. Шу тариқа Австралияда коронавирус оқибатида вафот этганлар сони 421 кишини ташкил қилмоқда. Бу ҳақда мамлакат Соғлиқни сақлаш вазирлигига таяниб, «Korrespondent.net» хабар берди.
Қайд этилишича, сўнгги 24 соат ичида Австралияда коронавирус билан касалланиш бўйича 289 та янги ҳолат қайд этилган.
Сўнгги маълумотларга кўра, пандемия бошидан буён Австралияда 23 576 кишида коронавирус аниқланган, 14 080 киши касалликдан тузалишга муваффақ бўлган. Мамлакатда касалликни аниқлаш бўйича жами 5,3 миллионта тест ўтказилган.
Айни пайтда даволанаётганларнинг 680 нафари касалхонага ётқизилган, улардан 47 нафари оғир аҳволда. Яна 7758 киши шифокорлар назорати остида уйда даволанмоқда.
Австралиядаги коронавирус билан боғлиқ энг мураккаб вазият маъмурий маркази Мельбурн шаҳри бўлган Виктория штатида кузатилмоқда. Мазкур ҳудудга касалланганлар умумий сонининг 70 фоизи (17 047 киши) тўғри келмоқда. Штатда 13 сентябрга қадар карантин эълон қилинган, корхоналар, ташкилот ва муассасаларнинг катта қисми ёпилган, барча таълим муассасалари масофавий таълимга ўтган, аҳолига зарур бўлмаган ҳолларда уйдан чиқмаслик ва мажбурий тартибда ниқоб тақиш тавсия қилинган.
Мельбурнда комендантлик соати, кескин чеклов чоралари ва мажбурий ниқоб тақиш жорий қилинган. Супермаркетлар, дорихоналар, чоп этиш агентликлари ва спиртли ичимликлар сотувчи махсус дўконлардан ташқари барча чакана савдо дўконлари ёпилган. Олиб кетиш ва етказиб бериш хизматларидан ташқари барча умумий овқатланиш шохобчалари ёпилган. Изоляция қоидаларини бузганлик учун 3529 доллар миқдорида жарима кўзда тутилган.
Австралияга қўшни бўлган Янги Зеландияда ҳам коронавирус қайта тарқалишни бошлаган. Янги Зеландия бош вазири Жасинда Ардерн 19 сентябрга режалаштирилган умумий парламент сайлови 17 октябрга қолдирилганини маълум қилди.
Бош вазирнинг қайд этишича, бундай қарорга мамлакатда коронавирус қайта тарқала бошлагани сабаб бўлган.
Ардерннинг таъкидлашича, сайловни кўчириш масаласи сиёсатчилар томонидан муҳокама қилинган ва шундан кейин якуний қарор қабул қилинган.
Янги Зеландияда 11 август куни сўнгги 102 кун ичида биринчи марта COVID-19 билан касалланиш ҳолати қайд этилган. Бир оиланинг тўрт нафар аъзосида касаллик аниқланган.
Мамлакат Соғлиқни сақлаш вазирлиги маълумотларига кўра, 15—16 август кунлари касалланиш билан боғлиқ 29 та янги ҳолат қайд этилган. Янги Зеландияда пандемия бошидан буён коронавирус билан касалланганлар сони 1631 кишига етган. Айни пайтда 78 киши касалликдан даволанмоқда. Янги аниқланган беморларнинг 58 нафари мамлакат ичида касалланган, 20 нафари эса хориждан келган. Беморларнинг беш нафари касалхонага ётқизилган, 86 киши касаллик тасдиқлангунигача карантинга жойлаштирилган. Шу пайтга қадар касалланганларнинг 22 нафари вафот этган, 1531 киши касалликдан тузалишга муваффақ бўлган.
12 августдан бошлаб Янги Зеландия фуқароларига ижтимоий масофа сақлаш, бегоналар билан жисмоний алоқани чеклаш тавсия қилинган. Оммавий тадбирлар иштирокчилари сони 100 киши билан чегараланган.
Мамлакат пойтахти Окленд шаҳрида қаттиқроқ карантин чоралари жорий қилинган. Шаҳар аҳолисига уйда қолиш, ижтимоий масофа сақлаш ҳамда кўчаларда ва жамоат жойларида имкон қадар ниқоб тақиш тавсия қилинган. Корхоналар, ташкилотлар ва муассасалар ёпилган, ўқув муассасалари масофавий таълимга ўтказилган. Оммавий тадбирлар бекор қилинган ёки иштирокчилар сони 10 киши билан чекланган. Шаҳарга кириш ва чиқиш полиция томонидан тўсилган.
Изоҳ (0)