Наманган вилоятининг Янгиқўрғон туманида маст акаси билан тортишган ука унинг қўлини белкуракда чопиб ташлади. Бу ҳақда «Дарё»га вилоят ИИБ ахборот хизмати маълум қилди.
Воқеа 2020 йилнинг 26 июль соат 20:00 атрофида Нанай қишлоғидаги «Дўстлик» маҳалласида рўй берди. Шу куни ота уйига маст ҳолда кириб келган акасини кўрган ука унга танбеҳ беради, ўртадаги даҳанаки можаро жанжалга айланади.
Ука жаҳлини жиловлай олмай, уйидан пичоқ олиб чиқиб, акасининг қорин ва бош қисмларига жароҳат етказади, бу ҳам камлик қилгандек, темир белкурак билан ташланади. Ака ўзини ҳимоя қилмоқчи бўлган вақтда эса белкурак билан унинг қўлини билак қисмидан чопиб ташлайди.
Сўнг жиноятни яширишга уриниб, кесилган қўлни қора елим пакетга солади ва уйининг ҳожатхонасига ташлаб юборади. Оила аъзолари воқеадан хабар топгач тез ёрдам чақирилиб, жабрланувчи шифохонага ётқизилади.
Шифокорларнинг хулосасида жабрланувчи меҳнат қобилиятининг 60 фоизини турғун йўқотилишига олиб келадиган оғир тан жароҳати олганлиги маълум қилинган. Мутахассисларнинг текширув натижаларига кўра, айбланувчи ҳодиса вақтида ва ундан кейин ҳам руҳан соғлом ҳолатда бўлган.
Янгиқўрғон туман ИИБ ҳузуридаги тергов бўлими терговчиси Достонбек Эркинжоновга кўра, мазкур ҳолат юзасидан ҳозирда тергов ҳаракатлари олиб борилмоқда. Айбланувчига нисбатан қамоққа олиш тарзидаги эҳтиёт чораси қўлланилган.
Изоҳ (0)