Коронавирусга қарши кураш штаби аъзоси, пластик жарроҳ Шуҳрат Боймуродов докадан ёки пахта матосидан қилинган тиббий ниқоблар юз терисига ҳеч қандай салбий таъсир кўрсатмаслигини маълум қилди. Бу ҳақда Telegram’даги «Шифобахш» каналида хабар берилди.
Тошкент тиббиёт Академияси профессори Шуҳрат Боймуродовнинг маълум қилишича, тиббий ниқобнинг юз терисига қай даражада таъсир этиши аввало унинг қандай матодан тайёрланганига боғлиқ.
«Кўп фойдаланаётган тиббий ниқобларимизнинг аксарияти синтетика матосидан тайёрланган. Биринчидан, синтетика ҳаво ўтказмайди. Иккинчидан, оғиз бўшлиғидаги териларни қичитади, аллергия чақириши ҳам мумкин. Шунинг учун ҳар икки соатда алмаштириш тавсия этилади. Докадан ёки пахта матасидан тайёрланган тиббиёт ниқобларидан фойдаланиш мақсадга мувофиқ. Биринчидан терига салбий таъсир кўрсатмайди. Иккинчидан, ҳавони яхши ўтказади. Учинчидан уларни ювиб, дазмоллаб яна қайта ишлатиш мумкин. Шунинг учун тиббиёт нуқтаи назаридан табиий пахтадан қилинган ниқобларга рухсат берилади», — деди мутахассис.
Профессорининг таъкидлашича, узоқ вақт тиббий ниқоб тақишдан кейин ҳосил бўладиган излар, қизариш ёки кўкариш ҳолатлари юз терисига ҳеч қандай таъсир қилмайди.
«Зарарланган тери қайта тикланиб, ўз ҳолатига яна қайтади, асорати қолмайди. Юз териси қўл терисидан фарқ қилади. Сабаби юз териси юпқароқ бўлади яъни тез шимувчи. Ниқобдан қолган излар ёки бошқа ҳолатлари йўқотиш мақсадида гелдан фойдаланишда унинг таркиби, юзнинг қуруқ ёки ёғлигига ҳам эътибор бериш лозим», — деди у.
Республика махсус комиссияси 15-авугстдан Ўзбекистонда карантин чоралари юмшатилаётгани муносабати билан фуқароларга мурожаатида жамоат жойларида ниқоб тақиб юриш, ижтимоий масофани сақлаш, қўлларни мунтазам ювиш ва антисептик гигиена воситаларидан доимий фойдаланишга чақирган.
Маълумот учун, Ўзбекистонда коронавирус эпидемияси тарқалишининг олдини олиш мақсадида 23 мартдан эътиборан оммавий тадбирлар, хусусан, тўй-маросимларнинг ўтказилиши тақиқланган эди. Ушбу тақиқдан сўнг тўй маросимларини ўтказишга уринганларга нисбатан ҳатто жиноят иши ҳам қўзғатилди. Мамлакатда эпидемиологик вазият барқарорлашиб, нисбатан назорат остига олингач, Республика махсус комиссиясининг 30 майдаги қарори билан «яшил» тоифага киритилган ҳудудларда оилавий тантана, тўй, маърака ва маросимларни 30 кишидан кўп бўлмаган ҳолда ўтказишга рухсат берилди.
Мамлакатда коронавирус билан боғлиқ вазият кескинлашаётгани сабабли 10 июлдан бошлаб мамлакатда тўйларни ўтказиш яна тақиқланганди. Ўзбекистонда карантин юмшатилиши асносида, 15 августдан бошлаб 30 кишилик тўйлар ўтказилишига, маҳаллий авиа ва темир йўл қатновларига рухсат берилган.
Изоҳ (0)