Ўзбекистонда 14 август соат 23:30 дан 15 август соат 23:30 гача коронавирус юқтириб олиш билан боғлиқ 684 та ҳолат қайд этилди. Кетма-кет тўққизинчи кун кунлик касалланиш ҳолати 700 га етмаяпти. Янги ҳолатлардан сўнг Ўзбекистонда коронавирусга чалинганлар сони 34701 нафарга етди.
Янги касалланиш ҳолатлари
Янги касалланган 684 кишининг барчаси коронавирусга чалинган беморлар билан мулоқотда бўлганлиги сабабли намуна олинган фуқаролар орасида аниқланган:- Тошкент шаҳрида — 488 нафар;
- Тошкент вилоятида — 147 нафар;
- Самарқанд вилоятида — 37 нафар;
- Наманган вилоятида — 8 нафар;
- Хоразм вилоятида — 4 нафар.
Тошкент шаҳрида 488 кишида коронавирус аниқланди. Август ойининг ортда қолган 15 куни ичида Тошкентда энг кам касаллик аниқланган кунда (2 август) 325 кишида, энг кўп касаллик аниқланган кунда (9 август) 509 кишида COVID-19 қайд этилди. 1—15 август оралиғида пойтахтда (карантин зонасида аниқланган ҳолатларни ҳисобга олмаса) 6379 та янги ҳолат аниқланди. Пойтахтда коронавирусга чалинганларнинг умумий сони 21 мингдан ошиб, 21002 нафарга етди. Ўзбекистон бўйича касалланиш ҳолатларининг 60,5 фоизи Тошкент шаҳри ҳисобига тўғри келмоқда.
Беш ойлик танаффусдан сўнг Тошкент метрополитени яна фаолиятини бошлади.
Қайта тикланган метрополитен фаолиятининг биринчи кунидан суратларни ушбу ҳаволада томоша қилишингиз мумкин.
Тошкент вилоятида 147 кишида коронавирус қайд этилди. Вилоятда 23 июлдан бошлаб ҳар куни касалликка чалиниш ҳолатлари қайд этилмоқда, 26 июлдан бери эса ҳар куни коронавирусга чалинганлар сони 100 нафардан ошмоқда (икки марта 200 тадан ҳам ошди). Август ойининг 15 куни ичида Тошкент вилоятида (карантин зонасида аниқланган ҳолатларни ҳисобга олмаса) 2308 кишида коронавирус аниқланди.
Самарқанд вилоятида 37 кишида COVID-19 аниқланди. Вилоятда август ойининг ўзида 491 кишида коронавирус қайд этилди. Солиштириш учун, 5 та ҳудуд (Жиззах, Фарғона, Қорақалпоғистон, Хоразм, Навоий)да эпидемия мавсуми бошидан буён бунча ҳолат қайд этилмаган. Ҳозирда Самарқандда коронавирусга чалинганлар сони 1429 нафарга етди.
Наманган вилоятида 8 кишида коронавирус қайд этилди. Вилоятда август ойида 75 кишида коронавирус аниқланди. Бу Наманган вилоятидаги жами касалланиш ҳолатларининг 9 фоизига тенг деганидир.
Хоразм вилоятида 4 кишида COVID-19 қайд этилди. Август ойи давомида вилоятда 63 та янги ҳолат қайд этилди. Бу Хоразмдаги барча касалланиш ҳолатларининг 14 фоизига тенгдир.
Ўлим ҳолатлари ва аҳволи оғир беморлар
Соғлиқни сақлаш вазирлиги Тошкент шаҳрида 3 нафар, Навоий ва Тошкент вилоятларида 1 нафардан, жами 5 нафар коронавирусга чалинган бемор вафот этганини хабар қилди. Худди бир кун олдин бўлганидек вафот этганларнинг 4 нафари эркак, 1 нафари аёлдир. Умуман олганда, 12 августдан бери ССВ ҳар куни 5 нафардан одам вафот этаётгани ҳақида хабар бермоқда.Биринчи ўлим. Тошкент шаҳри Юнусобод туманида яшаган 61 ёшли У.А. исмли эркак вафот этган.
Иккинчи ўлим. Тошкент шаҳри Юнусобод туманида яшаган 65 ёшли А.М. исмли эркак вафот этган.
Учинчи ўлим. Навоий вилояти Навоий шаҳрида яшаган 53 ёшли У.Х. исмли эркак вафот этган.
Тўртинчи ўлим. Тошкент вилояти Нурафшон шаҳрида яшаган 79 ёшли Б.Ж. исмли эркак вафот этган.
Бешинчи ўлим. Тошкент шаҳри Шайхонтоҳур туманида яшаган 70 ёшли М.У. исмли аёл вафот этган.
Ҳозиргача Соғлиқни сақлаш вазирлиги 226 кишининг коронавирус асоратларидан вафот этганини хабар берди. «Дарё» ҳисоби бўйича коронавирусга чалингач, вафот этганлар сони 235 нафарни ташкил этмоқда. Давлат хизматлари агентлиги 15 июль куни Навоий вилоятидаги 61 ёшли ходими Адҳамжон Деҳқонов, Маданият вазирлиги эса 18 июль куни 32 ёшли ходими Акмал Ирисов коронавирус асоратларидан вафот этгани, Олмалиқ шаҳри ҳокимлиги 9 ва 15 июль кунлари шаҳар шифохоналарида вафот этган икки аёлда коронавирус тасдиқлангани ҳақида хабар берган. Шунингдек, 19 июль куни Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, 22 июлда бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов коронавирус асоратларидан вафот этгани хабар қилинган. 31 июль куни Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов, 1 август куни Тойлоқ тумани прокурори Фарҳод Абдухолиқов, Инновацион соғлиқни сақлаш миллий палатаси «Буюк келажак» кенгаши эксперти Санжар Жалолов 58 ёшида вафот этгани хабар берилди. Бироқ ушбу тўққиз ҳолат ҳақида ССВ томонидан айни вақтгача ахборот берилмаган.
Айни пайтда коронавирус инфекциясидан даволанаётган 4432 нафар бемордан 1021 нафари оғир, 285 нафари эса ўта оғир аҳволда. Аҳволи оғир ва ўта оғир беморларнинг умумий сони 3 кундан буён камаймоқда: 12 август куни 1785 кишининг аҳволи оғир бўлган бўлса, 13 августда 1740, 14 августда 1651, энди эса 1306 нафар беморнинг аҳволи оғир. 12 августдан сўнг ССВ 15 кишининг вафот этгани ҳақида хабар беришга улгурди. Ҳозирда даволанаётган беморларнинг 29,5 фоизининг аҳволи оғир.
Касалликдан даволаниш
15 август куни Ўзбекистоннинг 8 та ҳудудида коронавирус инфекциясидан даволанаётган беморларнинг 1382 нафари соғайди. Кетма-кет бешинчи кун даволанганлар сони 1000 нафардан ортиқ бўлмоқда. 12 август куни 1569 нафар бемор соғайиб, рекорд ўрнатилганди.Янги тузалганларнинг
- 1044 нафари Тошкент шаҳрида;
- 295 нафари Тошкент вилоятида;
- 11 нафари Хоразм вилоятида;
- 10 нафари Қашқадарё вилоятида;
- 7 нафари Сирдарё вилоятида;
- 7 нафари Сурхондарё вилоятида;
- 6 нафари Наманган вилоятида;
- 2 нафари Қорақалпоғистон Республикасида касалликдан фориғ бўлди.
Маълумот учун, Ўзбекистонда коронавирус эпидемияси сабаб соғлиқни сақлаш тизимига тушаётган юкламани бир қадар енгиллатиш мақсадида 5 июлдан бошлаб коронавирус инфекцияси аломатсиз кечаётган беморларга уй шароитида даволанишга рухсат берилган, ушбу йўналишда йўриқнома ва эслатмалар ҳам эълон қилинган.
Бироқ Соғлиқни сақлаш вазирлиги коронавирусга чалинганларга доир ахборотларида янги беморларнинг қанчасида касаллик аломатсиз (симптомсиз) кечаётганига аниқлик киритмаяпти, шу боисдан айни вақтда коронавирусдан даволанаётган беморларнинг қанчаси касалхоналарда қолаётгани, қанчаси уй шароитида даволанаётгани маълум эмас.
Ҳозирда касаллик қайд этилган жами 34701 нафар бемордан 30043 нафари соғайиб, даволаниш кўрсаткичи 86 фоизни ташкил этмоқда. Бу даволаниш кўрсаткичи бўйича янги рекорддир. Бунгача 14 августдаги 84 фоизлик натижа энг яхши кўрсаткич бўлиб турганди.
Соғлиқни сақлаш вазирлиги маълумотлари бўйича айни пайтда 4432 нафар бемор COVID-19’дан даволанмоқда. 29 июль куни беморлар сони 9500 дан ортиқ эди. 30 июлдан бошлаб даволанаётган беморлар сони камая бошлади. Айни пайтда даволанаётган беморлар сони карантин чекловлари кучайтирилган кун — 10 июлдаги беморлар сонидан (ўша куни 4443 нафар бемор даволанаётганди) ҳам камайди.
Ҳозирда энг кўп бемор Тошкент шаҳрида даволанмоқда — 3291 нафар. Фарғонада 5, Жиззахда 9, Қашқадарёда 22, Хоразмда 26, Сурхондарёда 27, Навоийда 28, Қорақалпоғистонда 35, Наманганда 40, Сирдарёда 46, Андижонда 47, Бухорода 77, Самарқандда 138 ва Тошкент вилоятида 641 нафар бемор қолди.
Тошкент шаҳрида кетма-кет тўртинчи кун коронавирусдан соғайганлар 1000 дан ошган бўлса, Тошкент вилоятида 8-кун кетма-кет тузалганлар сони 200 дан ортиқ бўлмоқда. Иккала ҳудудда ҳам коронавирусдан даволанаётганлар сони бир ой ичидаги минимумга тушди. 17 июлдан бошлаб ССВ Тошкент шаҳри, Тошкент ва Сирдарё вилоятларининг статистикаларини алоҳида бера бошлаганди. 17 июль ҳолатига кўра, Тошкент шаҳрида коронавирусдан даволанаётганлар 4654 нафарни, Тошкент вилоятида 884 нафарни ташкил этаётганди.
Изоҳ (0)