Европа Иттифоқи мамлакатларининг вазирлари Беларусга қарши қўшимча санкциялар қўллашни бир овоздан маъқуллади. Бу ҳақда Еврокомиссия раҳбари Урсула фон дер Ляйен Twitter’даги саҳифасида эълон қилган.
«Ташқи ишлар вазирларининг бир овоздан Беларусдаги масъулларга нисбатан қўшимча санкциялар қўллашни маъқуллагани, яхши бўлди», — деб ёзган фон дер Ляйен.
Шунингдек, у Евроиттифоқ дипломатиясига раҳбар Жозеп Боррелнинг Twitter’да ёзган фикрига ҳам муносабат билдирган.
Боррель Европа иттифоқининг Беларусь сайловларида қайд этилган натижага қўшилмаслиги ҳақида ёзганди.
«Овозларни қалбакилаштириш ва мамлакатда фуқароларга нисбатан зўравонлик, куч ишлатишга йўл қўйганларга нисбатан санкциялар белгиланади», — деган Боррель.
Аввал Reuters агентлиги ЕИ давлатларининг 27 нафар ташқи ишлар вазири Беларусга санкция қўллашни келишиб олгани ҳақида хабар берганди. Агентлик манбасига кўра, Брюссель «қора рўйхат»га киритиладиган Беларусь расмийлари ҳақида маълумот тўпламоқда. Польша ташқи ишлари вазири Яцек Чапутовичнинг айтишича, ҳамкасбларининг аксарияти ушбу ташаббусни қўллаб-қувватлаган.
Беларусда президент сайловлари 9 август куни ўтказилган. Расмий маълумотларга кўра, амалдаги давлат раҳбари Александр Лукашенко 80 фоиздан кўпроқ овоз тўплаб, ғалаба қозонган. Мухолифот вакили Светлана Тихоновская эса МСК тақдим этган натижалар бўйича 10 фоиздан кўпроқ овоз олган. Тихановская штаби ушбу натижалар ҳаққонийлигини инкор этмоқда ва участкаларда 70-80 фоиз овоз мухолифот вакилига берилганини таъкидламоқда.
Мавзуга доир: Кўчадаги Беларусь. Намойишларнинг 6-куни дайжести
Овоз бериш бўйича дастлабки расмий маълумотлар эълон қилинганидан кейин Светлана Тихановская ўтказилган сайловларда ўзини ғолиб дея ҳисоблашини маълум қилди ва Лукашенкога музокаралар ўтказиш таклифини берди. Шунингдек, у сайловларнинг натижаси юзасидан Марказий сайлов комиссиясига норозилик билдирди.
11 август куни Тихановская Беларусдан чиқиб кетгани ва Литвада эканлиги маълум бўлди. Унинг штаби томонидан маълум қилинишича, президентликка номзод бу ишни ўз хоҳиши билан қилмаган, балки штаб раҳбари Мария Морознинг озод этилиши эвазига ҳукумат босими остида амалга оширган.
Изоҳ (0)