Россиянинг Санкт-Петербург шаҳрида яшовчи Анастасия Позняк фермага мўйнаси учун келтирилган иккита силовсинни қутқарди, у оиласи билан ҳайвонларни сотиб олди. Бу ҳақда у ўзининг Instagram’даги саҳифасида маълум қилди.
Шунингдек, силовсинлар Анастасиянинг уйидаги ёлғиз ҳайвон эмас, унинг саккизта кучуги ва иккита оти бор.
«Биз уларни кичкина мушуклигида сотиб олгандик ва улар катта бўлди. Гералт кучуклар билан дўст, одамларга содиқ. У қандай қилиб сайр қилишни билади ва хом гўшт истеъмол қилади», — дейди Анастасия.
Унинг сўзларига кўра, сўнгги пайтларда одамлар кўпроқ ҳайвонларга ёрдам беришни ва мўйна учун боқилаётган силовсин, тулки ва соболни қандай қутқаришни ўйламоқда.
Шунингдек, қиздан кўп маротаба силовсинлар эгасини ейдими, деб сўрашади. У, албатта, йўқ, деб жавоб берди.
«Биринчидан, ақли расо ҳайвон нега унга овқат бераётган одамни ейиши керак? Биз уни кичиклигидан овқатлантирдик, у идишдаги овқат қаердан келишини жуда яхши билар эди. Силовсин жуда кичкина эди. Мана ҳозир улар 18 дан 25 килогача вазн тўплади. Ушбу вазндаги ҳайвон учун ўзидан 2-3 баравар кўп оғирликда бўлган инсонни енгиш осон эмас. Табиатда одам ейдиган силовсинлар мавжуд эмас. Албатта, одам ейдиган пумалар, шерлар ва йўлбарс бор. Биз барча хавфсизлик чораларини кўриб қўйганмиз, масалан, улар билан ўйнаш вақтида тасодифан шикастланганда ёрдам беради».
Изоҳ (0)