Американинг Теннесси штатида истиқомат қилувчи Жейд Додд муддати ўтган ҳайдовчилик гувоҳномаси ўрнига янгисини олишга мажбур бўлди. Пандемия вақтида соғлиғи борасида таваккал қилмаслик учун у онлайн-хизматдан фойдаланишга қарор қилган ва кутилмаган натижага эга бўлган, деб ёзади Motor.
Гап одатда ҳужжатларда учрайдиган хато сўз ёки жумлалар ҳақида эмас. Додд почта орқали қабул қилган янги ҳайдовчилик гувоҳномасида унинг исми, туғилган куни, жинси, бўйи ва ҳатто кўзининг ранги ҳам тўғри кўрсатилган. Бироқ ҳайдовчининг расми туриши керак бўлган жойда кўк стул жойлашган.
Америкалик аёл ноодатий сурат билан ижтимоий тармоқларда бўлишиб, шундан сўнг Ҳайдовчиларга хизмат кўрсатиш марказига мурожаат қилган. Яроқсиз ҳайдовчилик гувоҳномаси зудлик билан Додднинг сурати бор янги ҳужжатга алмаштириб берилган. Бироқ қизиқарли расм тармоқларда тарқалишга улгуриб, маҳаллий ОАВ қизиқишини уйғотган.
News 2 телеканали Теннесси штати Ички хавфсизлик ва қўриқлаш департаментига мурожаат қилиб, ҳужжатда стул тасвири қандай қилиб пайдо бўлиб қолганига ойдинлик киритган. Маълум бўлишича, Доддни бир неча йил олдин суратга туширган Ҳайдовчиларга хизмат кўрсатиш марказининг ходими иккита хатога йўл қўйган: аввалига у бўш стулни суратга олган, кейин эса уни америкаликнинг профилига сақлаб қўйган.
«Мижоз муддати ўтган ҳайдовчилик гувоҳномасини алмаштирганида, стул унинг профилидаги сўнгги сурат бўлгани сабаб ҳужжатга тушиб қолган», — дея изоҳлайди департамент.
Изоҳ (0)