Қашқадарё вилоятида аукцион савдодан Китоб туманидаги ғишт заводини сотиб олиб, заводнинг собиқ эгалари қаршилигига учраган ва ўтган йиллар давомида ғишт заводидан фойдалана олмаган тадбиркор судда ғалабага эришди. Ва заводга эгалик ҳуқуқини қўлга киритди. Бу ҳақда судда қатнашган «Дарё» мухбири хабар берди.
Маълум бўлишича, вилоятда «ўзини эплолмаган» ва банкдан қарздорлиги бўлган ғишт заводининг аукционда сотилиши ҳамда заводнинг собиқ эгалари буни тан олмаслиги билан боғлиқ можаро 2020 йилнинг 13 август куни Қашқадарё вилоят иқтисодий судида кўриб чиқилган.
Қашқадарё вилоят иқтисодий судига апеллация шикояти киритган «Насаф нефть-газ қурилиш ва таъмирлаш» МЧЖ масъуллари Шаҳрисабз туманлараро иқтисодий судининг 2020 йилнинг 5 июль кунидаги қарорини ҳақиқий эмас деб топишни сўраган. «Қашқадарё нефть-газ қурилиш ва таъмирлаш» АЖнинг 2018 йил 19 февралдаги кимошди савдосини ҳақиқий эмас деб топишни сўраб ёзган шикоятини кўриб чиққан Шаҳрисабз туманлараро иқтисодий суди 2020 йилнинг 5 июль куни ўзининг қарори билан ташкил этилган аукцион савдони ҳақиқий эмас деб топган. Натижада заводни сотиб олган тадбиркор ҳуқуқи чекланган.
Таъкидлаш лозим, 2018 йил 19 февралдаги кимошди савдода Китоб ғишт заводи тадбиркор Баҳром Холиёров раҳбарлигидаги «Насаф нефть-газ қурилиш ва таъмирлаш» МЧЖ томонидан 690 миллион 494 сўмга сотиб олинган. Бироқ завод таъсисчиси бўлган «Қашқадарё нефть-газ қурилиш ва таъмирлаш» АЖ масъуллари мазкур аукцион савдо натижасини тан олмай, тадбиркорнинг фаолият юритишига тўсқинлик қилиб келган.
Қашқадарё вилоят иқтисодий судининг 2020 йилнинг 13 август кунидаги қарорига кўра, «Насаф нефть-газ қурилиш ва таъмирлаш» МЧЖ масъулларининг даъвоси қаноатлантирилиб, заводга эгалик ҳуқуқи тадбиркор Баҳром Холиёровга берилган.
Изоҳ (0)