Ўзбекистонда коронавирусга қарши курашиш ва уни олдини олишга қаратилган тадбирларига жами 1,6 трлн сўм маблағ ажратилган

Инқирозга қарши курашиш жамғармасидан Санитария-эпидемиологик осойишталик агентлиги ва унинг ҳудудий марказларига коронавируснинг янги тури кириб келиши ва тарқалишининг олдини олишга қаратилган тадбирларга 2020 йилнинг 11 август ҳолатига кўра жами 1,6 триллион сўм маблағ ажратиб берилди. Бу ҳақда Молия вазирлиги хабар бермоқда.

Маълум қилинишича, 7—11 август кунлари оралиғида коронавирус тарқалишининг олдини олишга қаратилган тадбирларга жалб этилган тиббиёт, санитария-эпидемиологик ва бошқа ходимларнинг 7 507 нафарига 63,3 миллиард сўм қўшимча рағбатлантириш тўловлари тўланди.

Молия вазирлиги маълумотига кўра, шу жумладан:

– ойлик лавозим маошига 6 фоиз миқдорида ҳар кунлик қўшимча тўловлари жами 3 703 нафар ходимга 4,9 миллиард сўм, шундан 842 нафар шифокорга – 1,6 миллиард сўм, 1 888 нафар ўрта тиббиёт ходимга – 2,4 миллиард сўм, 447 нафар кичик тиббиёт ходимга – 0,4 миллиард сўм ва 526 нафар бошқа ходимларга – 0,5 миллиард сўм;

– 14 кунлик фаолият даври учун махсус қўшимча рағбатлантириш тўловлари бўйича жами 2 974 нафар ходимга 57,1 миллиард сўм, шундан, 732 нафар шифокорга (ҳар бирига 25 миллион сўмдан) – 23,6 миллиард сўм, 1 145 нафар ўрта тиббиёт ходимга – 21,6 миллиард сўм, 818 нафар кичик тиббиёт ходимга – 10,1 миллиард сўм ва 279 нафар бошқа ходимларга – 1,8 миллиард сўм;

– Санитария-эпидемиологик осойишталик агентлиги ва унинг ҳудудий марказлари ходимларининг лавозим маошига меҳнатнинг соғлиқ учун хавфлилиги ва оғир шароитлари учун белгиланадиган қўшимча тўловлар миқдорини тегишинча 15 фоиздан 50 фоизга ҳамда 40 фоиздан 75 фоизга ошириш ҳамда меҳнатига ҳақ тўлаш разрядлари бўйича тариф коэффициентини 5 фоизга ошириш ҳисобига 830 нафар ходимга 1,2 миллиард сўм тўлаб берилган.

Аввалроқ Ўзбекистон давлат бюджети биринчи ярим йилликда 58,2 трлн сўмни ташкил этгани ҳақида хабар берилган эди.