Сўнгги пайтларда ОАВда, жумладан интернет, ижтимоий тармоқлар ва Telegram каналларда «Коронавирусга қарши препарат янада арзонроқ ва қулайроқ. «Тисовир» (фавипиравир) кенг таъсир доирадаги вирусга қарши препарат!» номи остида реклама видеоролиги кенг тарқалган бўлиб, бу кўплаб ижтимоий тармоқ фойдаланувчиларининг эътирозларига сабаб бўлмоқда. Бу реклама бўйича Истеъмолчилар ҳуқуқларини ҳимоя қилиш агентлиги расмий муносабат билдириб ўтди.
Агентликнинг таъкидлашича, биринчидан, ушбу дори воситаси шифокор рецепти асосида бериладиган препарат ҳисобланади. Шу муносабат билан, уни ОАВ орқали кенг жамоатчилик учун реклама қилиш мумкин эмас.
Иккинчидан, рекламада қўлланилган «кенг таъсир доирадаги вирусга қарши препарат! У барча РНК типидаги вирусларни, шу жумладан, SARS-CoV-2 янги коронавирус инфекцияси қўзғатувчисини (COVID-19) ингибирлайди» ибораси, умуман, (илмий, амалий) асосланмаган, яъни нотўғри реклама ҳисобланади.
Юқоридагиларга асосан, «Тисовир» (фавипиравир) дори воситаси рекламаси амалдаги қонун ҳужжатлари талабларига зид равишда жойлаштирилган.
Қайд этилишича, агентлик томонидан реклама ахборотларининг қонун ҳужжатлари талабларига мослиги юзасидан доимий равишда мониторинг кузатувлари ўтказиш ҳамда тегишли тезкор таъсир чораларини кўриш йўлга қўйилган.
Хусусан, 2020 йилнинг июнь—июль ойлари давомида 30 та шундай ҳолат аниқланиб, кўрилган тезкор чора-тадбирлар натижасида улар фаолиятига чек қўйилган.
Изоҳ (0)