Бухоро вилоятининг Ромитан туманида чўлдан исириқ ва қамиш ўсимлигини ўриб, ўғирлаб келаётган фуқаролар қўлга олинди. Бу ҳақда «Дарё»га вилоят Экология ва атроф-муҳитни муҳофаза қилиш бошқармаси ахборот хизмати маълум қилди.
Таъкидланишича, пешкулик фуқаро М.З. пандемия кунларида исириқ савдосининг жонланганидан фойдаланиб, текин даромад топишни мақсад қилган. У Ромитан туманидаги «Қизилработ» чўлидан исириқ ўсимлигини яширинча ўриб, ўғирлаб, юк машинасига ортган. Вилоят Экология ва атроф-муҳитни муҳофаза қилиш бошқармаси инспекторлари ҳамда «Қизилқум» давлат ўрмон хўжалиги ходимлари томонидан чўл массивларига туташ манзилларда ўтказилган тезкор рейдда фуқаронинг юк машинаси тўхтатилган ва ўғрилик ҳолати фош этилган.
Шу куни Пешку тумани ҳудудидаги «Қорақир» табиий сув ҳавзасида ишловчи фуқаро Ф.Т. ҳам 40 метр куб ҳажмдаги қамишни юк машинасига ортиб кетаётган вақтида қўлга олинган. У қамишни ўзи ишлайдиган сув ҳавзаси бўйларидан яширинча ўриб олгани ойдинлашган. Ф.Т.нинг Самарқанд вилояти, Каттақўрғон туманининг Катта араб қишлоғида яшаши маълум бўлган.
Қонунбузарларга нисбатан Маъмурий жавобгарлик тўғрисидаги кодекснинг 79-моддаси 1-қисми (дарахтлар, буталар, бошқа ўрмон ўсимликлари ва ниҳолларни ғайриқонуний равишда кесиш, шикастлантириш ёки йўқ қилиш)га мувофиқ чора кўрилган ҳамда етказилган моддий зарар тўлиқ ундирилган.
Изоҳ (0)