2020/2021-ўқув йилида амалдаги базавий тўлов-контракт миқдори учун кундузги шаклда ўқийдиган барча талабаларга бериладиган 10 фоизлик чегирма стипендиясиз шаклдаги тўлов-контракт миқдорига нисбатан ҳисобланади. Олий ва ўрта махсус таълим вазирлиги расмий вакилининг маълумотига таяниб, ЎзА хабар қилган.
Аввал пандемия шароитида аҳолининг тўлов қобилияти пасайишини ҳисобга олиб, фарзанди тўлов-шартнома асосида ўқийдиган оилаларга енгиллик яратиш ва уларни қўллаб-қувватлаш мақсадида янги 2020/2021-ўқув йилида амалдаги базавий тўлов-контракт миқдори учун кундузги шаклда ўқийдиган барча талабаларга 10 фоиз чегирма берилиши маълум қилинганди.
Тўлов-контрактга 10 фоизлик чегирма фақат давлат олий таълим муассасаларига тааллуқли. Нодавлат ёки хусусий олий таълим муассасалари, хусусан, Вестминстер, Инҳа, Турин политехника, MDIS, Ёджу, AKFA, ТЕАМ, Вебстер каби ОТМлар тўлов-контракт миқдорини ўзи мустақил белгилайди ва уларда чегирма ёки бошқача тарздаги имтиёзлар бериш тартиби бошқача. Ушбу чегирма ҳақидаги эълон уларга тааллуқли эмас.
Олий ва ўрта махсус таълим вазири Иномжон Мажидов Олий таълим муассасаларида 2020/2021-ўқув йилига тайёргарлик масалалари бўйича АОКАда ташкил этилган матбуот анжуманида ОТМларда 2020 йилда контракт миқдори ўзгартирилмаслигини, бироқ камайиши мумкинлигини айтганди.
2020 йилда Ўзбекистондаги олий таълим муассасаларига (ОТМ) бакалавриат босқичига 162 364 та, магистратурага 10 425 та ўрин ажратилган. Кириш имтиҳонлари икки сменада республика бўйича танлаб олинган 155 та стадионнинг 40 тасида ўтказилади.
Изоҳ (0)