Тошкент шаҳри Юнусобод туманида Санитария-эпидемиологик осойишталик маркази бош шифокори фуқароларга ноқонуний равишда махсус рухсатнома расмийлаштириб бергани аниқланди. Бу ҳақда Бош прокуратура ахборот хизмати хабар қилган.
Хабарга кўра, Бош прокуратура ҳузуридаги департаментнинг Юнусобод тумани бўлими томонидан ўтказилган терговга қадар текширувда туман Санитария-эпидемиологик осойишталик маркази бош шифокори Республика махсус комиссиясининг йиғилиш баёнига зид равишда 22 нафар фуқаронинг автотранспорт воситасига карантин вақтида эркин ҳаракатланиш учун сохта маълумотнома тайёрлаб, махсус рухсатнома расмийлаштириб бергани аниқланди.
Мазкур ҳолатлар юзасидан Жиноят кодексининг 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда, дейилади Бош прокуратура хабарида.
Аввал Андижон вилоятида карантин вақтида республика бўйлаб эркин ҳаракатланиш ҳуқуқини берувчи «яшил» йўлак рухсатномасини сохталаштирган бир гуруҳ шахслар қўлга олингани, Сирдарё вилоятида Сардоба сув тошқинидан кейин эвакуация қилинган аҳоли учун мўлжалланган ноозиқ-овқат маҳсулотларини сохта ҳужжат орқали талон-торож қилиш ҳолатлари кузатилганлиги аниқлангани, Тошкент вилояти Чирчиқ шаҳрида «Ўзстандарт» агентлиги собиқ ходими эски танишларини алдаб 32,7 миллион сўм пулини олгани ҳамда эвазига сохта ҳужжатларни ҳақиқий деб ишонтириб кетгани фош қилингани ҳақида хабарлар берилган.
Изоҳ (0)