Қорақалпоғистон Республикаси Амударё туманида 13 август куни спиртли ичимлик таъсиридаги Nexia-2 машинаси ҳайдовчиси велосипедда кетаётган икки нафар болаларни катта тезликда уирб кетиб, уларнинг ўлимига сабаб бўлди. Бу ҳақда Ички ишлар вазирлиги Йўл ҳаракати хавфсизлиги бош бошқармаси хабар берди.
Маълум қилинишича, 13 август куни соат 14:45 да Амударё тумани ҳудудидан ўтувчи 4Р 181 автомобиль йўлининг 2-километрида 1986 йилда туғилган ҳайдовчи Ш.Қ. Nexia-2 машинасини маст ҳолда, юқори тезликда бошқариб кетаётиб, ушбу йўналишда велосипедда ҳаракатланиб кетаётган икки нафар болани уриб юборган.
Натижада 2009 йилда туғилган Р.Г. ва велосипед йўловчиси, 2010 йилда туғилган Ш.Н. оғир тан жароҳатлари олиб воқеа жойида вафот этган.
Бош прокуратура томонидан «Дарё»га маълум қилинишича, мазкур ҳолат юзасидан 13 август куни Амударё туман прокуратураси томонидан Ш.Қ.га нисбатан Жиноят кодексининг 266-моддаси 3-қисми «а» банди (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан жиноят иши қўзғатилган.
Аввалроқ Тошкентда 19 ёшли ҳайдовчи бошқарувидаги Cobalt’нинг бетон тўсиққа урилиши оқибатида бир йўловчи, Labo’нинг реклама устунига урилиши натижасида ҳам бир йўловчи ҳалок бўлганди. Бухорода носоз «Москвич» ариққа тушиб кетиши оқибатида икки киши вафот этганди. Жиззахда Lada Largus ҳамда Isuzu юк машинаси иштирокидаги ЙТҲ икки йўловчининг умрига зомин бўлганди. Сирдарёда икки Nexia тўқнашувида бир киши ҳалок бўлганди.
Изоҳ (0)