Майамидаги Curated автосалони ноёб Cizeta V16T суперкарига эга бўлди. Мазкур нусха аввал Бруней султонига тегишли бўлган бўлиб, кўк рангда ишлаб чиқарилган ягона модель ҳисобланади, деб хабар беради Motor.
Суперкар умумий қиймати миллиардлаб долларга баҳоланувчи Бруней султони Ҳассанал Болкиахнинг улкан коллекциясида бўлган. Curated компанияси бундан олти ой олдин султондан спорткарни сотиб олган ва ҳозирда уни сотувга қўймоқчи.
Биринчи Cizeta V16T 1998 йилда тақдим этилган. Автомобиль Lamborghini собиқ муҳандиси Клаудио Замполли, продюсер Жоржио Мородера ва дизайнер Марчелло Гандини ҳамкорлигида яратилган. Дастлаб Cizeta’ни Lamborghini Diablo’га ўхшаб яратиш режалаштирилган, бироқ натижада ушбу фикрдан қайтилган.
Бир жуфт «кўр» фараларга эга ноодатий купени йиғиш 1991 йилда бошланган. Режага кўра, йилига 40 га яқин автомобиль ишлаб чиқариш керак бўлган, бироқ 1995 йилга келиб 19 нусха йиғилган, халос. 1996 йилдан 2006 йилга қадар эса яна учта, жумладан, битта родстер йиғилган.
Султонга тегишли бўлган Cizeta 101 шассисида яратилган бўлиб, 1993 йили Женева автосалонида тақдим этилган. Автомобиль деярли йўл босмаган: у матбуот ва реклама тадбирларида иштирок этган. 27 ёшли купе ҳозирга қадар 983 километр йўл босган.
Cizeta V16T’га 540 от кучига эга 6,0 литрли V16 двигатели ўрнатилган бўлиб, у тўрт сониядан камроқ вақт ичида соатига 100 километр тезликка эриша олади. Двигатель беш поғонали механик узатмалар қутиси ёрдамида бошқарилади. Максимал тезлиги — 328 км/соат.
Ноёб Cizeta V16T қанчага баҳоланаётгани номаълум, чунки купе ҳозирча савдога қўйилмаган. 1990 йилларда бу каби автомобиль 650-850 минг долларга баҳоланган.
Изоҳ (0)