Токиода 11 ва 12 август кунлари кузатилган иссиқ об-ҳаво оқибатида камида 14 киши вафот этган. Бу ҳақда Япониянинг NHK телеканалига таяниб «ТАСС» хабар берди.
Таъкидланишича, марҳумларнинг тўққизтаси 80 ёшдан ошган. Маълумотларга кўра ҳаммаси бўлиб, август ойида 26 та Токио аҳолиси жазирама иссиқда вафот этди.
Японияда Фавқулодда вазиятлар вазирлиги ва Тез ёрдам хизмати вазифасини бажарувчи Умумий ёнғин бошқармаси 3-дан 9 августгача бўлган даврда мамлакатда ўнлаб одам қурбон бўлгани ва 6,6 минг киши иссиқлик сабаб тез ёрдамга мурожаат қилгани ҳақида хабар қилди.
Шу муносабат билан, Япония ҳукумати фуқароларни иссиқ кунларда соғлиғини диққат билан кузатиб бориш зарурлиги тўғрисида огоҳлантириб, уларни кўпроқ суюқлик ичишга ундаган.
Шу ҳафта Японияда ёзнинг энг иссиқ вақти кузатилмоқда. Баъзи жойларда ҳаво ҳарорати кундузи 38 даражадан ошмоқда. Гунма марказий префектурасида 11 август куни ҳаво ҳарорати кундузи 40,1 даражага қадар кўтарилган.
Япониядаги энг иссиқ об-ҳаво даври июль—август ойларида содир бўлади, аммо кетма-кет иккинчи йил июль ойида кўпроқ булутли ва ёмғирли ҳаво бўлди. 2019 йили жазирама пайтида 126 киши ҳалок бўлган, 70 мингдан ортиқ киши зарар кўрган.
Изоҳ (0)