Тадқиқотларда аниқланишича, стресс ҳазм жараёни ва вазн тўпланишига таъсир кўрсатмай қолмайди ва шунинг учун ҳам аксари инсонлар эмоцияга берилганидан кейин ширинлик ейишни истайди. Run review нашри стрессни енгишда аҳамиятли бўлган маҳсулотлар қайсилардан иборат эканига тўхталади.
Яшил кўкат ва сабзавотлар
Исмалоқ, карам, брокколи, салат барги, райҳон ҳамда бошқа яшил сабзавот ва кўкатлар — B гуруҳи витаминларининг кони ҳисобланади ва олимлар томонидан мотивация молекуласи деб таъриф бериладиган дофамин — гормон ва нейромедиторларни фаоллаштиради. Шунинг учун ҳам ушбу сабзавотлар тушкунлик ва умидсизликдан халос этувчи маҳсулотлар қаторига киритилади.
Грек ёнғоғи
Грек ёнғоғи саломатлик учун фойдали бўлган омега-3 дан ташқари, инсон ўзини яхши ҳис қилишида аҳамиятли бўлган гормон — серотонин ишлаб чиқарилишига таъсир кўрсатувчи аминокислота — триптофанни ҳам ўз ичига олади. Кайфиятни кўтариш учун кунига бир ҳовуч грек ёнғоғини истеъмол қилишнинг ўзи кифоя.
Сули ёрмаси
Ушбу маҳсулот нафақат саломатлик, балки инсон ўзини қандай ҳис қилишига ҳам таъсир қилиши хусусиятига эга бўлиб, мутахассис ва парҳезшунослар томонидан тонгни сули ёрмасидан тайёрланган нонушта билан қарши олиш тавсия қилинади. Инсон асабийлашганида қондаги қанд миқдори ошади, клетчатканинг кони бўлган сули ёрмаси эса уни меъёрда сақлайди.
Черника
Черника организмнинг қариш жараёни тўхтатиш ва стресснинг олдини олиш хусусиятига эга бўлган антиоксидантларнинг манбайи бўлибгина қолмай, асабийлашганда инсон организмидан ажраладиган кортизол гормонини меъёрлаштирувчи маҳсулотлардан бири ҳисобланади. Қолаверса, постравматик синдромни бартараф этиш учун ҳам тавсия қилинади. Черника сархил ёки яхлатилган ҳолда истеъмол қилинишидан қатъи назар, фойдалилик хусусиятини йўқотмайди.
Қора шоколад
Кайфиятни кўтаришнинг кўпчиликка маълум ва афзал бўлган йўлларидан бири қора шоколад бўлагини истеъмол қилиш ҳисобланади. Какао дуккакларида мавжуд полифенол сабаб ушбу маҳсулот истеъмолидан кейин организмда стресс гормонлари, хусусан, кортизол миқдори камаяди ва инсон ўзини яхши ҳис қилади.
Изоҳ (0)