ИИВ ҳузуридаги Тергов департаментининг хабар қилишича, 2020 йил 10 август куни соат 16:30 да Жиззах вилояти Зомин тумани ҳудудидаги А-376 автомобиль йўлининг 239-километрида йўл транспорт ҳодисаси содир бўлган.
42 ёшли Р.А. бошқарувидаги Lada Largus Ховос туманидан Даштобод йўналишига қараб ҳаракатланиб кетаётган вақтида ўзидан олдинда кетаётган машинани қувиб ўтиш учун қарама-қарши йўналишга чиққан. Оқибатда 42 ёшли Р.Х. бошқариб келаётган Isuzu юк машинасининг олди томонига бориб урилган. Департамент ахборотида Lada’нинг тахминан қандай тезликда ҳаракатлангани юзасидан маълумот берилмаган.
Йўл-транспорт ҳодисаси оқибатида Lada Largus ичидаги йўловчилар 31 ёшли Х.Б. ва 55 ёшли Б.Б. исмли икки аёл воқеа жойида вафот этган. Енгил машина ҳайдовчиси Р.А., йўловчилар 30 ёшли Б.Б. ва унинг фарзандлари 6 ёшли Г.Р. исмли қиз ҳамда 4 ёшли Р.Р. турли даражадаги тан жароҳатлари билан туман тиббиёт бирлашмасига ётқизилган.
Ҳолат юзасидан Зомин тумани ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 266-моддаси 3-қисми (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган, ҳозирда тергов ҳаракатлари олиб борилмоқда, дейилади Тергов департаментининг хабарида.
Жиззахда одам ўлими билан боғлиқ йўл транспорт ҳодисалари тез-тез кузатилиб туради. Жумладан, 2020 йил 16 июнда Жиззах вилоятининг Бахмал туманида юз берган ЙТҲда 5 яшар бола, 4 июлда Жиззах вилояти Ғаллаорол туманида Nexia ва Damas русумли автомашиналари иштирокирдаги ЙТҲ оқибатида Damas йўловчилари 42 ёшли Э.С. ва 47 ёшли Ш.Э. тан жароҳати олиб, ҳодиса жойида вафот этган. 24 июль куни «ЗИЛ»дан сакраб қолган 18 ёшли А.С. ҳамда Lacetti уриб юбориши оқибатида 5 ёшли Т.Э. исмли қизча ҳалок бўлган. 27 июлда Жиззах вилояти Мирзачўл тумани «Ўзбекистон» ҚФЙ ҳудудида 29 ёшли фуқаро бошқарувидаги Cobalt 4 ёшли болани уриб юборгани, Жиззах шаҳрида Malibu велосипедда кетаётган мактаб ўқувчисини уриб юборгани ва ўсмирнинг тан жароҳатлари билан шифохонага ётқизилгани (иккала ҳодиса ҳам 23 июлда содир бўлган) ҳақида хабар берилган.
Изоҳ (0)