Картон конструкциялари ёрдамида турли тажрибаларни ўтказиш билан шуғулланувчи YouTube’даги The S канали муаллифлари Tesla Cybertruck нусхасини яратди. Пикап нусхаси 20 минг гугурт донасидан ясалган «ўлим ҳалқаси»га юборилган.
Канал томонидан эълон қилинган роликда пикапни олдиндан қирқиб олинган картон қисмлардан йиғиш жараёни тасвирланган. Моделнинг ғилдирак ўқлари вазифасини ёғоч таёқчалар бажарган. Cybertruck нусхаси биргина детални ҳисобга олмаганда анча аниқ ишланган: юк платформасининг ўрнини эгаллаган улкан ракетага ўхшаш «найча».
Тайёр моделнинг айнан ўша қисмига минглаб синдирилган гугурт доналари жойлаштирилган. Шундан сўнг муаллифлар «ўлим ҳалқаси»нинг йиғилиш жараёнини суратга олган ва пикапга «ўт қўйган». Видеода картон машина ҳеч қандай муаммосиз ҳалқадан айланиб ўтиб, трамплиндан сакраганини кўриш мумкин. Бу каби мураккаб трюкдан кейин ҳам модель омон қолган.
Эслатиб ўтамиз, Tesla Cybertruck моделининг илк сериялари 2021 йил охири бориб ишлаб чиқариш режалаштирилмоқда. Электропикапнинг минимал нархи 39 990 доллар.
Изоҳ (0)