Россияда коронавирус инфекциясининг иккинчи тўлқини октябрь ойида бошланади. Иккинчи тўлқиндаги беморлар ёзда COVID-19’га чалинганлардан кўра касалликни оғир ўтказади. Бу ҳақда Россия тиббиёт фанлари доктори, эпидемиолог ва вирусли инфекцияларни назорат қилиш ва олдини олиш бўйича мутахассис Михаил Фаворов маълум қилди, деб хабар беради «РБК».
«Ҳозир касал бўлганлар қишнинг бошида касал бўлганлардан кўра яхшироқ имкониятга эга», – деди Фаворов.
Мутахассиснинг таъкидлашича, ҳозирги кунда одамлар касалликни нисбатан енгил ўтказади. Чунки қуёш ультрабинафша нурлари таъсирида вирус ёзда жуда суст ва камроқ тажовузкор бўлади.
«Ҳозир қанча кўп одам касал бўлса, касаллик оғир кечадиган мавсумда шунча кам одам вирус юқтиради», – деди эпидемиолог.
Таъкидланишича, мавсумий тўлқинлар барча нафас йўллари инфекцияларида кенг тарқалган. Фаворовнинг сўзларига кўра, Москвада касаллар сонининг кўпайиши аста-секин бошланади ва шаҳар апрель ойининг статистикасига ноябрь ёки январдан олдинроқ яна қайтади, шундан сўнг эпидемия кўлами бироз пасаяди.
Жонс Ҳопкинс университетининг 10 август соат 10:00 да берган маълумотига кўра, Россияда жами 885 718 нафар кишида коронавирус аниқланган. Беморларнинг 692 059 киши соғайган, 14 903 нафари эса вафот этган.
Аввалроқ Россияда вакцина синови якунлангани ва оммавий эмлаш октябрда бошланиши, шунингдек, мамлакатда ҳар ойда миллионлаб доза вакцина ишлаб чиқарилиши ҳақида хабар берилган эди.
Изоҳ (0)