Фармацевтика компаниялари ва илмий-тадқиқот ташкилотларини бирлаштирган Клиник тадқиқотлар ташкилотлари ассоциацияси Россия Соғлиқни сақлаш вазирлигини Гамалей номидаги Эпидемиология ва микробиология марказида ишлаб чиқилган вакцинани рўйхатдан ўтказишни кечиктиришга чақирди. Meduza’нинг ёзишича, бу ҳақда ассоциациянинг вазирлик раҳбари Михаил Мурашкога юборган мурожаатида қайд этилган.
Мурожаатда айтилишича, вакцина яратувчилари унинг синовларини ҳатто юзлаб одамлар иштирокида ҳам якунламаган. Бундан ташқари, унинг асосида MERS’га қарши бошқа вакцина бўлиб, унинг синовлари ҳали ҳам давом этмоқда. Шу сабабли унинг самарадорлиги тўғрисида хулоса беришга ҳали асос йўқ.
Мурожаат муаллифлари Соғлиқни сақлаш вазирлигини «вакцина ишлаб чиқишда ҳовлиқмасликка» чақирди, чунки дунёда 26 та номзод вакцина мавжуд ва уларнинг олтитаси минглаб, ҳатто ўн минглаб одамлар иштирокида синовдан ўтказилмоқда.
«Рўйхатга олишни тезлаштириш энди Россияни ушбу пойгада етакчига айлантирмайди, у вакцинанинг охирги фойдаланувчиларини кераксиз хавф-хатарга қўяди холос», — дейилади мурожаатда.
Аввалроқ Гамалей маркази томонидан ишлаб чиқилган коронавирус вакцинасининг клиник синовлари якунлангани тўғрисида хабар берилганди. Мамлакат саноат ва савдо вазири Денис Мантуров 2021 йилнинг бошига бориб Россия фармацевтика саноати ҳар ой коронавирусга қарши вакциналарни бир неча миллион дозада ишлаб чиқаришини маълум қилган.
Изоҳ (0)