Тожикистон Фан ва таълим вазирлигининг қарорига кўра, мамлакатда янги ўқув йили ҳар йилгидек 1 сентябрдан эмас, балки 17 августдан бошланади. Бу ҳақда Asia Plus хабар берди.
Тожикистон таълим вазири Маҳмадюсуф Имомзоданинг сўзларига кўра, ўқув йилининг бошланишини кўчириш ҳақидаги қарорнинг қабул қилиниши ўтган ўқув йилининг охирида ўқувчилар ва ўқитувчилар коронавирус пандемияси сабабли белгиланган режадан ортда қолгани билан боғлиқ. Вазирнинг қайд этишича, бу вақт мослашув даври бўлади ҳамда қолиб кетган дарслар ўтилади.
Тожикистон Фан ва таълим вазирлиги ҳукуматга янги ўқув йилида ўқув жараёнини ташкил қилиш бўйича учта сценарийни таклиф қилган: масофавий, ярим масофавий, санитария-эпидемиологик талабларга риоя қилган ҳолда анъанавий таълим. Республика штаби 5 август куни таълимни анъанавий шаклда санитария-эпидемиологик талабларга риоя қилган ҳолда ташкил этиш ҳақида қарор қабул қилди. Барча ўқувчилар мактабга бориб, таълим олади. Бунда улар мажбурий тартибда ниқоб тақиши ва антисептик воситалардан фойдаланиши керак.
Тожикистоннинг Соғлиқни сақлаш ва аҳолини ижтимоий муҳофаза қилиш бўйича давлат назорати хизмати мутахассиси Фирдавс Аҳроровнинг маълум қилишича, Тожикистонда аҳолининг кўп қисми интернетдан фойдаланиш имконига эга эмаслиги ва унинг қимматлиги сабабли таълимнинг анъанавий шакли қўллаб-қувватланган.
Унинг сўзларига кўра, ўқув муассасаларида кириш чоғида барча таълим олувчиларнинг ҳароратини ўлчаш ва қўлларига антисептик воситалар билан ишлов бериш жараёни ташкил қилиниши керак. Шунингдек, мактабларда ниқоб тақиш мажбурий бўлади ҳамда ўқувчилар ўзи билан антисептик воситалар олиб юриши керак. Унинг айтишича, ўқув муассасаларини ҳар куни дезинфекция қилиш ҳам мажбурий бўлади.
Мактабларда ўқув жараёнини уч сменада ташкил қилиш, ижтимоий масофани таъминлаш учун синфларни гуруҳларга бўлиш, парталар орасини узайтириш, спорт заллари, конференция заллари ва бошқа ёрдамчи бинолардан фойдаланиш, коридорларда бир томонлама ҳаракатни йўлга қўйиш режалаштирилмоқда.
Қайд этилишича, Тожикистонда ўқув йили мамлакат президенти ва шифокорлари касалликнинг янги тўлқинига тайёр бўлиш ҳақида огоҳлантираётган бир пайтда бошланади. Ўқув йили бошланиши билан касалланиш хавфи бир неча марта ошади.
Шифокорлар фикрича, ҳозирги пайтда мамлакатда вазият барқарор, бироқ қисқа вақт ичида вазият ёмонлашиши мумкин.
Фирдавс Аҳроровнинг айтишича, куз келиши билан касалланиш сони бироз ортиши кутилмоқда. Агар вазият ёмонлашса, санитария-эпидемиология хизмати ҳукуматга масофавий таълимга ўтишни тавсия қилади.
Эслатиб ўтамиз, Ўзбекистонда янги ўқув йили олий таълим муассасаларида масофавий шаклда бошланади. Халқ таълими вазирлиги эса ўқув йилини бошлаш бўйича учта сценарий устида иш олиб бораётганини маълум қилган.
Изоҳ (0)