Украина президенти Владимир Зеленский Беларусда оммавий норозилик намойишлари билан якунланган президентлик сайловларидан сўнг ўзининг Facebook’даги саҳифаси орқали чиқиш қилди.
Зеленский Беларуснинг барча аҳолиси ҳам амалдаги президент Александр Лукашенко сайловларда ғолиб чиққани тўғрисидаги Марказий сайлов комиссияси маълумотларига қўшилмаяпти. «Бу каби кўламдаги шубҳа — тобора кучайиб бораётган зўравонлик, можаро, оммавий тартибсизликларга тўғри йўлдир», — дейди Зеленский. У беларусларни сабрли бўлишга, кўчаларда зўравонликларни амалга оширмасликка ва мураккаб бўлса-да, максимал даражада очиқ диалогга чақирган.
«Украина ва шахсан мен Беларусь ростан ҳам кучли иқтисодиёт ҳамда барқарор ижтимоий алоқаларга эга мустақил ва демократ давлатга айланишидан манфаатдормиз. Беларусь — бизнинг яқин қўшнимиз ва шу сабабли у ерда бўлаётган нарсалар ва дўстларимиз билан келажакда рўй берадиган ҳодисаларга бефарқ эмасмиз», — дейди Зеленский.
Шу билан бирга, Беларуснинг яна бир яқин қўшниси ҳисобланувчи Польша норозилик намойишларини қаттиққўллик билан бостирилиши ҳамда ўзбошимчалик билан ҳибсга олинишларни қоралаган. Польша ТИВ Беларусь ҳукуматини вазиятни чигаллаштиришни тўхтатишга ва асосий инсон ҳуқуқларига риоя қилишни бошлашга чақирган.
Беларусда 9 август куни президент сайлови бўлиб ўтди. Дастлабки расмий маълумотларга кўра, унда сўнгги 26 йилдан бери мамлакатга раҳбарлик қилиб келган Александр Лукашенко 80 фоиз овоз билан олдинда бормоқда. Айни вақтда, мустақил экзит-пол маълумотлари сайловда Лукашенконинг энг асосий рақиби — Светлана Тихановская катта устунликка эришганини кўрсатмоқда.
Изоҳ (0)