Жанубий Кореяда ой бошидан буён давом этиб келаётган кучли ёғингарчилик оқибатида юзага келган сув тошқинлари ва кўчкилар сабаб камида 31 киши ҳалок бўлди, яна 11 киши бедарак йўқолганлар сафида. Бу ҳақда Табиий офатларга қарши туриш марказий штабига таяниб, «ТАСС» хабар берди.
Ўтган дам олиш кунлари Кванжу шаҳрида, шунингдек, Жанубий ва Шимолий Чолла провинцияларидан 13 киши ҳалок бўлган. Мамлакатдаги 11 та шаҳар ва провинцияда сув тошқинлари хавфи сабаб 7 мингга яқин одам эвакуация қилинган, 3,4 минг фуқаро вақтинчалик яшаш пунктларида қолмоқда.
Маълумотларга кўра, 14 мингдан ортиқ уй-жойлар ва жамоат бинолари, шунингдек, 4,3 мингга яқин кўприк ва автомобиль трассаларига шикаст етган. Ҳозирга қадар 700 га яқин кўчки қайд этилган, 25 минг гектар қишлоқ хўжалиги маҳсулотлари сув остида қолиб кетган. Кучли ёғингарчилик қатор темир йўл участкаларида ҳаракатларнинг тўхтаб қолишига сабаб бўлган.
Синоптиклар ёмғир кучайишини прогноз қилмоқда, чунки Корея яриморолига «Чанми» тайфуни яқинлашяпти. У 11 август куни Чедудо ороли яқинига, шундан сўнг мамлакатнинг жанубий қирғоқларига етиб келиши кутилмоқда. Прогнозларга кўра, Жанубий Корея ҳудудига 80-250 миллиметр ёмғир ёғади.
Аввалроқ Жанубий Кореяда кучли сел келиши оқибатида 10 дан ортиқ одам ҳалок бўлгани тўғрисида хабар берилганди. Таъкидланишича, табиий офат оқибатлари билан курашиш учун 25 мингдан ортиқ полициячи ва қутқарувчилар, шунингдек, кўнгиллилар жалб қилинган.
Изоҳ (0)