Беларусда президент сайлови бўлиб ўтмоқда. Пойтахт марказида ҳарбий техника пайдо бўлган

Беларусда 9 август куни президент сайлови бўлиб ўтмоқда: мамлакатда маҳаллий вақт билан соат 8:00 да 5 723 та сайлов участкаси очилган, дея хабар бермоқда «Белта» агентлиги.

Беларусдан ташқарида яна 44 та сайлов участкаси ташкил этилган. Овоз бериш жараёни маҳаллий вақт билан соат 20:00 да тугайди. «ТАСС»нинг аниқлик киритишича, Беларуснинг 6,8 миллион аҳолиси овоз бериш ҳуқуқига эга.

Агар сайловчиларнинг ярмидан кўпи овоз беришга келса, сайлов бўлиб ўтган деб ҳисобланади. Овоз берган сайловчиларнинг ярмидан кўпроғининг овозини қўлга киритган номзод эса президент этиб сайланган деб топилади.

«ТАСС»нинг қўшимча қилишича, Беларусь Марказий сайлов комиссияси (МСК) томонидан сайловнинг дастлабки натижаларини 9 август оқшомида, ярим тунга яқин эълон қилиши кутилмоқда.

«Тут.бу» нашрининг гувоҳлар сўзларига таяниб хабар беришича, Беларусь пойтахти Минск марказида ҳарбий техника пайдо бўлган. «Радио Свобода» эса Минскка Молодечно томондан кириш жойида «ЙПХ машинаси, иккита ҳарбий машина, ўқ ўтмас нимча, юзига қора ниқоб ва бошига дубулға кийган одамлар» тургани ҳақида хабар берган.

Май ойидан бери Минскда ва Беларуснинг бошқа шаҳарларида президентликка номзодлар ва фаолларнинг ҳибсга олинишига қарши, шунингдек, Беларусь МСКнинг мухолифатчи номзодларни, хусусан, «Белгазпромбанк»нинг собиқ раҳбари Виктор Бабарикони (у 2020 йил июнида «пул ювиш» иши доирасида айбланиб, ҳибсга олинган) рўйхатга олишдан бош тортганига норозилик сифатида оммавий намойишлар бўлиб ўтмоқда.

Норозилик намойишларида 100—150 нафардан одам қўлга олинган. Беларусь Тергов қўмитаси 14 июль куни Минскда бўлиб ўтган норозилик намойишининг 17 нафар иштирокчисига нисбатан иш очган. Улар милиция ходимларига нисбатан зўрлик ишлатишда гумон қилинмоқда.

Сайловга бир неча кун қолганида — 6 ва 8 август кунлари — Минскда президентликка номзод Светлана Тихановскаянинг штаби раҳбари Мария Мороз ушланган, шунингдек, Тихановскаянинг штаби аъзоси Мария Колесникова ҳам қўлга олинган, бироқ ярим соатдан сўнг «бошқа одам билан адаштириб юборишгани»ни айтиб, қўйиб юборишган.