2020 йил февраль–июнь ойлари давомида Италияда 1,5 миллион атрофидаги аҳоли COVID-19 коронавирус инфекцияси билан касалланиб, ундан тузалган. Бу ҳақда мамлакатда ўтказилган тадқиқотлар асосида «Интерфакс» хабар берди.
Бу аввалги статистикадан 6 бараварга кўпроқ дегани. Фарқнинг бундай сезиларли ва катта бўлишига Италияда COVID-19 статистикаси касалликка тест топширгандан кейин унинг натижаси «мусбат» чиққан кишиларгина умумий ҳисоб-китобга киритилгани билан изоҳланмоқда.
Тадқиқотда олимлар италияликлар орасида COVID-19 коронавирусига қарши антитаналар ишлаб чиқиб касалликни енга оладиган одамлар сонини текшириб олган. Антитаналарнинг борлиги одамларнинг вирусга қарши курашиб, иммунитет ҳосил қилганини англатади.
Серологик тадқиқотда деярли 65 минг нафар одам иштирок этган. Шундан кейин тадқиқотчилар мамлакатдаги коронавирус билан боғлиқ вазиятни таҳлил қилиш учун тахминий пропорцияни тузган. Якунда италияликларнинг 2,5 фоиз қисмида COVID-19 коронавирус инфекциясига қарши антитаналар мавжудлиги ойдинлашган.
Италия – Европа қитъасида коронавирусда энг кўп зарар кўрган мамлакатлардан бири. Айниқса баҳорда мамлакат шимолидаги эпидемиологик вазият жуда оғир кечган.
Изоҳ (0)