2020-yil fevral–iyun oylari davomida Italiyada 1,5 million atrofidagi aholi COVID-19 koronavirus infeksiyasi bilan kasallanib, undan tuzalgan. Bu haqda mamlakatda o‘tkazilgan tadqiqotlar asosida “Interfaks” xabar berdi.
Bu avvalgi statistikadan 6 baravarga ko‘proq degani. Farqning bunday sezilarli va katta bo‘lishiga Italiyada COVID-19 statistikasi kasallikka test topshirgandan keyin uning natijasi “musbat” chiqqan kishilargina umumiy hisob-kitobga kiritilgani bilan izohlanmoqda.
Tadqiqotda olimlar italiyaliklar orasida COVID-19 koronavirusiga qarshi antitanalar ishlab chiqib kasallikni yenga oladigan odamlar sonini tekshirib olgan. Antitanalarning borligi odamlarning virusga qarshi kurashib, immunitet hosil qilganini anglatadi.
Serologik tadqiqotda deyarli 65 ming nafar odam ishtirok etgan. Shundan keyin tadqiqotchilar mamlakatdagi koronavirus bilan bog‘liq vaziyatni tahlil qilish uchun taxminiy proporsiyani tuzgan. Yakunda italiyaliklarning 2,5 foiz qismida COVID-19 koronavirus infeksiyasiga qarshi antitanalar mavjudligi oydinlashgan.
Italiya – Yevropa qit’asida koronavirusda eng ko‘p zarar ko‘rgan mamlakatlardan biri. Ayniqsa bahorda mamlakat shimolidagi epidemiologik vaziyat juda og‘ir kechgan.
Izoh (0)