Bugun,

  • USD 11095.31
  • RUB 173.84
  • EUR 10772.44

Dunyo bo‘ylab keng muhokamalarni keltirib chiqarayotgan “Plakvenil” (gidroksixloroxin) dori vositasi O‘zbekiston tajribasiga ko‘ra, o‘zining ijobiy samarasini ko‘rsatmoqda. Bemor bilan muloqotda bo‘lganlarga ham profilaktika sifatida mazkur dori haftasiga 2 ta tabletka berilyapti. Bu haqda 3-avgust, dushanba kuni AOKAda o‘tkazilgan matbuot anjumanida ma’lum qilindi, deb xabar bermoqda “Daryo” muxbiri.

Tadbirda Koronavirusga qarshi kurash shtabi a’zosi Anvar Alimovning ta’kidlashicha, JSST “Plakvenil”ning koronavirusni davolashdagi ta’sirini o‘rganish bo‘yicha boshlagan ishini yakuniga yetkazmagan.

Foto:

Foto: "Daryo"

“Jahon sog‘liqni saqlash tashkiloti “Plakvenil”ning koronavirusni davolashdagi ta’sirini o‘rganish bo‘yicha 26-may kuni ishchi guruhini tashkil etdi. Ammo o‘rganish ishlarini oxirigacha yetkazmasdan, tekshiruvlar to‘xtatilgani to‘g‘risida 3-iyun kuni ma’lumot berdi.

Keyin JSST barcha davlatlarga Lancet jurnalida chop etilgan ma’lumotlarni asos sifatida ko‘rib chiqinglar, deb tavsiya berdi. Yuqorida aytganimdek, tashkilot tekshiruvlarni amalga oshirish bo‘yicha ishchi guruh tuzdi. Bir haftadan so‘ng “Biz bu tekshiruvlarni to‘xtatyapmiz. Natijasi hali noma’lum, biz bunga yana qaytamiz”, deya mavzuni yopdi. Bu “Plakvenil” mavzusining siyosiy masala ekanini ko‘rsatadi”, dedi Alimov.

SSV vakili Habibullo Oqilovning fikricha, O‘zbekiston o‘z tajribasiga asosan, “Plakvenil”dan foydalanmoqda va bu samara beryapti.

“JSST topshiriq beradigan tashkilot emas, u faqat tavsiya beruvchi tashkilot. Uning tavsiyalarini qabul qilish-qilmaslik har bir davlatning o‘ziga bog‘liq.

O‘zbekiston mart oyidan beri shu kungacha koronavirus bilan kurashib, bu borada o‘z tajribasiga ega bo‘ldi. Shuning uchun biz boshqalarning tajribasiga qaramasak ham bo‘ladi.

Bizning tajribamizga ko‘ra, “Plakvenil” ishlayapti, o‘z samarasini ko‘rsatyapti. Davolash protokolining 6-versiyasi – hozir amal qilayotgan variantida ham “Plakvenil” bor. U faqatgina kasallikning boshlang‘ich bosqichida, ya’ni birinchi 3-5 kunda berilsa, o‘z samarasini ko‘rsatmoqda.

Bundan tashqari, bemor bilan muloqotda bo‘lganlarga profilaktika sifatida “Plakvenil”dan haftasiga 2 ta tabletka berilyapti. Bu ham protokolga kiritilgan. Lekin har bitta versiyaga “Bu vaqtincha qabul qilingan qo‘llanma”, deb yozib qo‘yilgan. Ertaga, indinga, keyingi haftaga ma’lumotlar o‘zgaradigan bo‘lsa, bunga yana o‘zgartirishlar kiritilaveradi. Bugungi kunga kelib, bu dori bizda qabul qilingan va iste’mol qilinmoqda.

Bir necha hafta oldin mamlakatimizda 12 ming nafar bemor davolanib chiqqanini va ularning aksariyati “Plakvenil” qabul qilganini aytgandim. So‘nggi statistika bo‘yicha davolanib chiqqan 16 ming 838 nafar bemorning ham ko‘p qismi “Plakvenil” olgan. Chunki shifoxonalarda davolanayotganlarning aksariyati bitta sxema asosida davolanmoqda va mana shu ijobiy ta’sir ko‘rsatmoqda”, dedi Oqilov.

Foto:

Foto: "Daryo"

Shtab a’zosi “Plakvenil”ni profilaktika maqsadida ichish mumkinligi hamda ushbu dorining O‘zbekiston tajribasidagi ijobiy ta’sirini tasdiqlovchi tadqiqotlar o‘tkazilmaganligiga to‘xtalarkan, xususan, shunday dedi:

“AQSh davlat rahbari, Braziliya prezidenti Bolsonaru ham koronavirusdan profilaktika uchun “Plakvenil” ichdi.

Amerikada koronavirus shifoxonalarida ishlayotgan o‘zbek mutaxassislari bilan gaplashganimizda, ular ham “Plakvenil” bo‘yicha turli yondashuvlar borligini, ammo shifoxonada ishlayotganlarning hammasi profilaktika uchun shu dorini ichayotganini aytishdi. Shuning uchun ham biz uni protokolga kiritdik va kasallikka chalinganlar bilan birinchi muloqot qilganlarga tavsiya etyapmiz.

“Plakvenil”ning O‘zbekistonda davolash protokolidan chiqarilib, keyin yana kiritilgani butun dunyoda kuzatilmoqda. Lancet jurnali shunday yozgani uchun ko‘pchilik uni protokoldan chiqardi, jurnal maqolasini qaytarib olgach, aksariyat davlatlar yana uni qo‘llashga qaytdi. Biz ham o‘z tajribamizga qaytdik. Bu doridan voz kechganimizda kasallik ko‘rsatkichlari salbiy tomonga o‘zgardi, buni ko‘rdik.

Hozir bu dorining tajribamizdagi ta’sirini tadqiqot qilishga vaqt ham, ehtiyoj ham yo‘q. 16 ming 300 nafardan ziyod tuzalib chiqqan bemorlarning kasallik tarixi bor. Ular arxivda kamida 25 yil turadi. Ular asosida ko‘p tadqiqotlar qilinadi, unda xulosalar chiqarilishiga aminman”, dedi Habibillo Oqilov.

Izoh
Asosiy yangiliklar
Dunyo
“Turkiya yangi dunyo tartibining markazida bo‘lishi kerak” — Erdo‘g‘on
Mahalliy
Andijonda 41 kishi jarohatlangan avtohalokat qurbonlari soni 4 nafarga yetdi
Mahalliy
O‘zbekistonda qaysi hududlarda narxlar ko‘proq o‘sgani ma’lum qilindi