Туркиянинг Истанбул шаҳрида 2020 йилнинг 16 ва 30 июль кунлари Turkish Airlines авиакомпанияси томонидан ташкил этилган чартер рейсда жами 42 нафар ўзбекистонлик йўловчи парвоздан қолиб кетгани хабар қилинганди. Ўзбекистоннинг Истанбулдаги бош консулхонаси мазкур ҳолат юзасидан изоҳ берди.
Консулхонанинг ахборотига кўра шу вақтга қадар доимий яшаш жойига қайта олмаган жами 4 343 фуқаро Туркиядан Ўзбекицонга эвакуация қилинган. 2020 йилнинг 16 июлида 329 нафар, 30 июлда эса 278 нафар йўловчи навбатдаги Истанбул – Тошкент чартер рейси билан Ўзбекистонга қайтган.
«2020 йилнинг 16 июлида қолиб кетган 12 та фуқаро парвоз учун шакллантирилган рўйхатдан жой олмаган эди. Turkish Airlines авиакомпанияси ўз регламентига мувофиқ, парвозгача 1,5 соат вақт қолганда келмаган йўловчиларнинг ўрнига тегишли чипталарни рўйхатда мавжуд бўлмаган бошқа йўловчиларга сотган. Ушбу ҳолатда чипта сотиб олган фуқаро зарур ҳужжатларини тақдим этиб, тезкорлик билан чегарадан ўтиш ишларини амалга оширса, муаммосиз самолёт бортига етиб олиши мумкин. Бироқ афсуски, рўйхатда бўлмагани ҳолда чипта сотиб олган фуқаролар чегарадан ўтиш жараёнида Туркия ҳудудида бўлиш қонун-қоидаларини бузганлиги аниқланган ва тегишли маъмурий чоралар кўрилган. Оқибатда улар тегишли чартер парвозига ўз вақтида етиб олмаган. Тартибга мувофиқ самолёт белгиланган вақтда Тошкентга учиб кетган», – дея дастлабки ҳолатга шарҳ берган консулхона.
Қайд этилишича, 30 июлдаги парвоз вақтида ҳам шунга ўхшаш ҳолат кузатилган.
Инстанбул бош консулхонаси маълумот беришича Туркияда виза режимини бузган чет элликлар ҳаво йўли чегарасидан ўтиш жараёнида Туркия Миграция идорасининг бўлинмасига (виза иҳлали офиси) чақирилади ва бу ерда тегишли суҳбатдан ўтади. Ҳуқуқбузарларга тегишли жаримани ихтиёрий равишда тўлаш таклиф этилади. Жаримани тўлашни рад этган одамга нисбатан муайян муддат давомида Туркия ҳудудига киришини тақиқлашни назарда тутувчи маъмурий жавобгарлик қўлланилади.
«Истанбул халқаро аэропорти одатдаги тартибда фаолият кўрсатмоқда ва Миграция идорасининг бўлинмасида узун навбатлар юзага келмоқда. Фуқароларнинг визалари билан боғлиқ масалаларини ҳал этишга амалий кўмак кўрсатиш юзасидан Ўзекистоннинг Туркиядаги элчихонаси ва Истанбул шаҳридаги Бош консулхонаси томонидан турк томонига тегишли мазмундаги мурожаатлар юборилган. Туркия ташқи ишлар вазирлиги тегишли мутасадди ташкилотлар билан Ўзбекистон ваколатхоналарининг мурожаатини ижобий кўриб чиққан ва карантин чора-тадбирлари натижасида юзага келган вазият сабабли Туркияда бўлиш қоидаларини бузган фуқароларга нисбатан маъмурий жавобгарлик жорий этилмаслигини билдирган. Мавжуд вазиятдан келиб чиқиб, чартер парвозларига рўйхатга олинган фуқароларни чегарадан ўтиш жараёнини ўз вақтида амалга ошириши учун Истанбул халқаро аэропортига эртароқ келишларини сўраб қоламиз», – дейилган консулхона ахборотида.
Бош консулхона 16 июлда парвоздан қолиб кетган ўзбекистонликларга тегишли консуллик-ҳуқуқий ёрдами берилиб, уларни мамлакатга қайтариш чоралари кўрилаётганини билдирган. 30 июлдаги рейсда қайта олмаган фуқароларни ҳам чартер рейсларда Ўзбекицонга қайтарилиши таъминланиши қайд этилган.
Аввал 31 июлда 144 нафар фуқаро меҳнат фаолиятини амалга ошириш учун Ўзбекистондан Россиянинг Амур вилоятига жўнатилгани, 1 августда Республика махсус комиссиясининг қарорига мувофиқ, хориждаги ўзбекистонликларни олиб келиш учун 2 августдан 16 августга қадар амалга ошириладиган навбатдаги чартер рейсларнинг жадвали тасдиқлангани ҳамда AllTrip.uz компанияси Wиндросе авиакомпанияси билан ҳамкорликда Украинадан Ўзбекистонга қайтиш истагида бўлган йўловчилар учун Киев—Харков—Тошкент—Киев йўналишида чартер қатновини амалга ошириши хусусида хабарлар берилган.
Изоҳ (0)