Бухоро вилоятининг Ғиждувон туманида уйида қиморхона ташкил қилиб, пул эвазига карта ўйини ўтказган фуқарога суд ҳукми ўқилди. Бу ҳақда «Дарё»га жиноят ишлари бўйича Ғиждувон туман суди судьяси Бобораҳим Очилов маълум қилди.
Маълум бўлишича, фуқаро Аброр (барча исмлар ўзгартирилган) карантин талабларига риоя қилмай, 2020 йилнинг 3 апрель куни соат 17:30 да ўзи яшаб келаётган уйининг меҳмонхонасида таваккалчиликка асосланган қимор ўйинини ташкил қилган. Қишлоқдошлари Ғофур, Марат, Нодир ва Бобур билан қимор ўйнаётган пайтда, соат 22:00 да, Аброрнинг қўшниси Носир кириб келиб, ҳолатни қўл телефонига тасвирга олган.
Орадан кўп вақт ўтмай, меҳмонхонага ИИБ ходимлари икки нафар холис билан кириб келган. Аброр илгари ҳам ўз хонадонида пул эвазига қимор ўйини ташкил этиб, қўни-қўшниларининг тинчини бузиб келгани ойдинлашган. Воқеа жойидан икки қути ўйин карталари ва 320 минг сўм пул тегишли тартибда ҳужжатлаштириб олинган.
Аброр судда ўз айбига иқрор бўлиб, қарамоғида уч нафар вояга етмаган фарзанди, қари онаси ва иккинчи гуруҳ ногирон акаси борлигини, оиланинг ягона боқувчиси эканлигини, қилмишидан пушаймонлигини билдирган.
У Жиноят кодексининг 278-моддаси 1-қисми (Қимор ва таваккалчиликка асосланган бошқа ўйинларни ташкил этиш ҳамда ўтказиш) билан айбли деб топилиб, уч йил муддатга озодликни чеклаш билан жазоланган.
Изоҳ (0)