Turkiyaning Istanbul shahrida 2020-yilning 16 va 30-iyul kunlari Turkish Airlines aviakompaniyasi tomonidan tashkil etilgan charter reysda jami 42 nafar o‘zbekistonlik yo‘lovchi parvozdan qolib ketgani xabar qilingandi. O‘zbekistonning Istanbuldagi bosh konsulxonasi mazkur holat yuzasidan izoh berdi.

Istanbul aeroporti
Foto: Tengrinews

Konsulxonaning axborotiga ko‘ra shu vaqtga qadar doimiy yashash joyiga qayta olmagan jami 4 343 fuqaro Turkiyadan O‘zbekitsonga evakuatsiya qilingan. 2020-yilning 16-iyulida 329 nafar, 30-iyulda esa 278 nafar yo‘lovchi navbatdagi Istanbul – Toshkent charter reysi bilan O‘zbekistonga qaytgan. “2020-yilning 16-iyulida qolib ketgan 12 ta fuqaro parvoz uchun shakllantirilgan ro‘yxatdan joy olmagan edi. Turkish Airlines aviakompaniyasi o‘z reglamentiga muvofiq, parvozgacha 1,5 soat vaqt qolganda kelmagan yo‘lovchilarning o‘rniga tegishli chiptalarni ro‘yxatda mavjud bo‘lmagan boshqa yo‘lovchilarga sotgan. Ushbu holatda chipta sotib olgan fuqaro zarur hujjatlarini taqdim etib, tezkorlik bilan chegaradan o‘tish ishlarini amalga oshirsa, muammosiz samolyot bortiga yetib olishi mumkin. Biroq afsuski, ro‘yxatda bo‘lmagani holda chipta sotib olgan fuqarolar chegaradan o‘tish jarayonida Turkiya hududida bo‘lish qonun-qoidalarini buzganligi aniqlangan va tegishli ma’muriy choralar ko‘rilgan. Oqibatda ular tegishli charter parvoziga o‘z vaqtida yetib olmagan. Tartibga muvofiq samolyot belgilangan vaqtda Toshkentga uchib ketgan”, – deya dastlabki holatga sharh bergan konsulxona. Qayd etilishicha, 30-iyuldagi parvoz vaqtida ham shunga o‘xshash holat kuzatilgan. Instanbul bosh konsulxonasi ma’lumot berishicha Turkiyada viza rejimini buzgan chet elliklar havo yo‘li chegarasidan o‘tish jarayonida Turkiya Migratsiya idorasining bo‘linmasiga (viza ihlali ofisi) chaqiriladi va bu yerda tegishli suhbatdan o‘tadi. Huquqbuzarlarga tegishli jarimani ixtiyoriy ravishda to‘lash taklif etiladi. Jarimani to‘lashni rad etgan odamga nisbatan muayyan muddat davomida Turkiya hududiga kirishini taqiqlashni nazarda tutuvchi ma’muriy javobgarlik qo‘llaniladi. “Istanbul xalqaro aeroporti odatdagi tartibda faoliyat ko‘rsatmoqda va Migratsiya idorasining bo‘linmasida uzun navbatlar yuzaga kelmoqda. Fuqarolarning vizalari bilan bog‘liq masalalarini hal etishga amaliy ko‘mak ko‘rsatish yuzasidan O‘zekistonning Turkiyadagi elchixonasi va Istanbul shahridagi Bosh konsulxonasi tomonidan turk tomoniga tegishli mazmundagi murojaatlar yuborilgan. Turkiya tashqi ishlar vazirligi tegishli mutasaddi tashkilotlar bilan O‘zbekiston vakolatxonalarining murojaatini ijobiy ko‘rib chiqqan va karantin chora-tadbirlari natijasida yuzaga kelgan vaziyat sababli Turkiyada bo‘lish qoidalarini buzgan fuqarolarga nisbatan ma’muriy javobgarlik joriy etilmasligini bildirgan. Mavjud vaziyatdan kelib chiqib, charter parvozlariga ro‘yxatga olingan fuqarolarni chegaradan o‘tish jarayonini o‘z vaqtida amalga oshirishi uchun Istanbul xalqaro aeroportiga ertaroq kelishlarini so‘rab qolamiz”, – deyilgan konsulxona axborotida. Bosh konsulxona 16-iyulda parvozdan qolib ketgan o‘zbekistonliklarga tegishli konsullik-huquqiy yordami berilib, ularni mamlakatga qaytarish choralari ko‘rilayotganini bildirgan. 30-iyuldagi reysda qayta olmagan fuqarolarni ham charter reyslarda O‘zbekitsonga qaytarilishi ta’minlanishi qayd etilgan. Avval 31-iyulda 144 nafar fuqaro mehnat faoliyatini amalga oshirish uchun O‘zbekistondan Rossiyaning Amur viloyatiga jo‘natilgani, 1-avgustda Respublika maxsus komissiyasining qaroriga muvofiq, xorijdagi o‘zbekistonliklarni olib kelish uchun 2-avgustdan 16-avgustga qadar amalga oshiriladigan navbatdagi charter reyslarning jadvali tasdiqlangani hamda AllTrip.uz kompaniyasi Windrose aviakompaniyasi bilan hamkorlikda Ukrainadan O‘zbekistonga qaytish istagida bo‘lgan yo‘lovchilar uchun Kiyev—Xarkov—Toshkent—Kiyev yo‘nalishida charter qatnovini amalga oshirishi xususida xabarlar berilgan.