Сергелидаги можаро видеосида маҳалла маъмуриятидан шикоят қилган аёл ҳайитлик пулини олганини айтиб, миннатдорчилик билдирди ва англашилмовчилик учун узр сўради. Аслида видеода ёрдам олмагани айтилган оилага давлат томонидан мунтазам равишда ёрдам бериб келингани маълум бўлди.
«Ёнимдаги эркак киши олмадим, деса мен ишониб ўтирибман. Мен уларнинг гапига қўшилиб, бу одам ҳам олмади, деб айтиб юбордим. Ваҳолангки, бугун бориб қарасак, хотини эридан беркитган, эр хотинидан беркитган — 2,5 миллионни олишган экан улар. Ҳайитликка берилган 1 миллион сўмни ҳам мендан олдин олиб бўлишган экан. Яна ҳомийлар ҳам ёрдам бераркан. Лекин бу гапни биздан беркитиб, менинг важоҳатимдан фойдаланиб, гапирса, ўзимдек кўрибман», — дейди Нилуфар Баратова.
Аввалроқ Сергелида аҳоли ва маҳалла маъмурияти ўртасида 1 миллион сўмлик нақд пул ёрдами устида можаро юзага келгани тўғрисида хабар берилганди. Видеоёзувларнинг бирида аҳоли вакиллари «Ҳумо» маҳалласи маъмуриятини ёрдам пулини бермаётганликда айблаган, ёрдам пули сўраб келганларга маҳалла маъмурияти банкдан кредит олишни тавсия қилаётгани таъкидланган.
Эслатиб ўтамиз, Президент Шавкат Мирзиёевнинг 30 июлдаги фармонига мувофиқ пандемия шароитида моддий ёрдам ва кўмакка муҳтож оилаларнинг рўйхатларига («темир дафтар»га) киритилган ва аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам пули берилиши маълум қилинган эди. Шунингдек, Ўзбекистон ҳукуматнинг тегишли фармойишига асосан «Саховат ва кўмак» жамғармаси орқали ижтимоий ҳимояга муҳтож оилаларга Қурбон ҳайити арафасида 1 миллион сўмдан моддий ёрдам тарқатилиши таъкидланган эди.
1 август куни Тошкент шаҳар ҳокими Жаҳонгир Ортиқхўжаев ушбу можаро сабаб маҳаллага бориб аҳоли билан учрашган.
Изоҳ (0)