Ижтимоий тармоқларда Тошкентнинг Сергели тумани «Humo» маҳалласида нақд пул шаклидаги бир марталик ёрдам пули масаласида маҳалла аҳолиси ва маъмурияти ўртасида юзага келган зиддиятли ҳолат акс этган видеоёзув тарқалди.
Видеоёзувларнинг бирида аҳоли вакиллари «Humo» маҳалласи маъмуриятини ёрдам пулини бермаётганликда айблаган, ёрдам пули сўраб келганларга маҳалла маъмурияти банкдан кредит олишни тавсия қилаётгани таъкидланган. Яна бир видеода ички ишлар органлари ходимлари маҳалла маъмурияти вакилларини норози аҳолидан ҳимоя қилишга уринаётгани, бу орада маҳалла маъмурияти вакиллари ва ички ишлар ходимлари ўртасида ҳам низо юзага келганини кўриш мумкин.
Эслатиб ўтамиз, Президент Шавкат Мирзиёевнинг 30 июлдаги фармонига мувофиқ пандемия шароитида моддий ёрдам ва кўмакка муҳтож оилаларнинг рўйхатларига («темир дафтар»га) киритилган ва аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам пули берилиши маълум қилинган эди. Шунингдек, Ўзбекистон ҳукуматнинг тегишли фармойишига асосан «Саховат ва кўмак» жамғармаси орқали ижтимоий ҳимояга муҳтож оилаларга Қурбон Ҳайити арафасида 1 миллион сўмдан моддий ёрдам тарқатилиши таъкидланган эди.
Ушбу янгиликлар юзасидан изоҳ бераркан, Иқтисодий тараққиёт ва камбағалликни қисқартириш вазирининг биринчи ўринбосари Акмалхон Ортиқов: «Пулларни қайсидир бир идоранинг кичик ходими ёки кассирига ишониб топшириб қўйганмиз йўқ, давлатнинг ваколатли одамларига ишониб топширилди бу пуллар», деганди. У озиқ-овқат тўплами ёки дори-дармон шаклида моддий ёрдам тарқатишда камчиликлар учрагани, «ҳамма масъуллар ҳам бу масалага виждон билан ёндашмаётгани» учун, бир марталик моддий ёрдам пулларини нақд пул шаклида тарқатишга қарор қилинганини айтиб ўтган эди.
Қайд этиш жоиз, Сергели тумани «Humo» маҳалласи 2020 йил баҳоридаги карантин вақтида ҳам айнан моддий ёрдам масаласи сабаб ОАВда тилга олинган эди. Ўшанда Маҳалладаги кўп қаватли 26-уйда яшайдиган 32 оила (ушбу оилаларда ногиронлиги бор фуқаролар яшаган) ёрдамга муҳтож экани, карантин бошланганидан бери улардан хабар олинмагани ҳақида Ўзбекистон Миллий ахборот агентлиги (ЎзА) ёзиб чиққач, ушбу хонадонларга зарурий озиқ-овқат маҳсулотлари жамланмалари етказиб берилган эди. Ушбу ҳолатни изоҳларкан, Сергели тумани ҳокими ўринбосари — маҳалла ва оилани қўллаб қувватлаш бўлими бошлиғи Ойгул Сатторова «кам таъминланган оилалар кўплиги учун хайрия ёрдамлари етиб бориши бироз қийин кечаётгани»ни таъкидлаган эди.
