Самарқанд шаҳрида карантин пайтида ҳод-дог тайёрлаб бермаган бозор қоровулини калтаклаган А.Т. уч йил муддатга озодликдан маҳрум қилинди, дея хабар берди «Дарё» мухбири.
Жиноят ишлари бўйича Самарқанд шаҳар судида бўлиб ўтган суд мажлисида судланувчи А.Т. айбига қисман иқрор бўлиб, 2020 йил 28 март кунидан 29 мартга ўтар кечаси бўлғуси турмуш ўртоғи билан телефонда тортишиб қолганлиги учун асабларини тинчлантириш мақсадида савдо дўконидан ичимлик суви харид қилиш учун кўчага чиққанини айтиб берган.
Таъкидланишича, А.Т. 2020 йил 29 март куни соат 02:30 да Самарқанд шаҳридаги деҳқон бозори олдида жамиятда юриш-туриш қоидаларини бузиб, 63 ёшли Ҳусинали Муродовнинг қўл ва оёқларига урган ва оғир тан жароҳати етказган.Жабрланувчи Ҳусинали Муродовнинг судда маълум қилишича, А.Т. унинг ёнига нотаниш киши билан келиб, ҳод-дог қилиб беришни сўраган. У эса карантин пайти ишламаётганлигини, ҳод-дог учун керакли маҳсулотлар йўқлиги билдирган. А.Т. эса отахонни сабабсиз қўли билан ура бошлаган. Кейин унинг қулоғидан ториб, дўкондан ташқарига олиб чиққан ва нима учун ҳод-дог қилиб бермаслигини сўраб, бақирган. Сўнг яна 10-15 метрга олиб кетиб, қўллари билан бошига урган. А.Т. отахонни ҳақорат қилиб, уришни давом эттирганда таниши уларни ажратиб, «бобойни ўлдириб қўясан» деган.
Жиноят ишлари бўйича Самарқанд шаҳар суди судьяси Зарифа Аҳмедованинг «Дарё»га маълум қилишича, судланувчи А.Т. Жиноят кодексининг 104-моддаси 2-қисми «в», «э» бандлари (Безорилик қилиб, шафқатсизларча қасддан баданга оғир шикаст етказиш) билан айбли деб топилиб, 3 йил муддатга озодликдан маҳрум қилинган.
Изоҳ (0)