28 июль куни соат 22:00 ларда Сурхондарё вилояти Ангор туманидаги маҳаллий корхоналардан бирига тегишли омбор ҳудудида ёқилғи цистернаси портлаб кетди, деб хабар беради ФВВ матбуот хизмати.
Маълумотларга кўра, 1981 йилда туғилган пайвандчи К.А. дизель ёқилғиси солинган 10 тонналик цистернани пайванд қилиб ямамоқчи бўлган. Хавфсизлик техникаси қоидаларига риоя қилмаслик цистернанинг портлашига олиб келган.
Фавқулодда ҳодиса оқибатида фуқаро К.А. воқеа жойида вафот этган, унинг ёнида турган П.К. эса танасининг турли даражадаги куйишлари билан туман тиббиёт бирлашмасига етказилган.
Аланга цистерна ёнида турган Isuzu русумли юк машинасининг ҳам бутунлай ёниб кетишига сабаб бўлган.
«Ҳодиса жойига етиб келган Сурхонадарё вилояти Фавқулодда вазиятлар бошқармасининг иккита ёнғин-қутқариш экипажи тезкорлик билан ёнғинни ўчиришга муваффақ бўлди», — дейилади хабарда.
Изоҳ (0)