Sardobalik ayollar bir oylik chaqaloqni 18 ming dollarga sotmoqchi bo‘lganda qo‘lga olindi
Sirdaryo viloyatining Guliston shahrida 23-iyun, seshanba kuni 2020-yilning may oyida tug‘ilgan chaqaloqni sotmoqchi bo‘lgan ayollar qo‘lga olindi. Bu haqda Ichki ishlar vazirligi matbuot xizmati xabar berdi.
Ma’lum qilinishicha, Sirdaryo viloyati IIB tomonidan o‘tkazilgan tezkor tadbir davomida Sardoba tumanida yashovchi L. va M. ismli ayollar L.ning farzandini 18 ming dollar evaziga sotgan vaqtida qo‘lga olingan.
Tadbir davomida L. hamda M. ismli ayollardan ashyoviy dalil tariqasida 18 ming dollar olingan. Mazkur holat yuzasidan hozirgi vaqtda Sirdaryo viloyati IIB xodimlari tomonidan tezkor tekshiruv ishlari olib borilmoqda.
Mazkur ayollar Sardoba falokatidan jabrlangan yoki yo‘qligi noma’lum.
Eslatib o‘tamiz, 1-may kuni soat 05:55 da Sirdaryo viloyatida joylashgan Sardoba suv ombori to‘g‘onining 6-piket devorida suv chiqishi yuzaga kelgandi. Favqulodda vaziyat sababli Sardoba, Oqoltin, Mirzaobod tumanlaridagi 24 ta mahalladan 90 mingga yaqin fuqaro zudlik bilan xavfsiz hududga evakuatsiya qilingan. Suv toshqini oqibatida 4435 ta xonadon talafot ko‘rgan. Ulardan 2390 tasi yaroqsiz holga kelgan, 2045 tasi esa ta’mirtalab holatda. Sardoba tumani “Do‘stlik” mahallasida 37 ta 1480 xonadonli; Mirzaobod tumani “Haqiqat” mahallasida 20 ta 800 xonadonli va “Navbahor” mahallasida 9 ta 360 xonadonli ko‘p qavatli turar joy qurilish ishlari boshlangan.
15-may kuni Prezident Shavkat Mirziyoyev sardobaliklar bilan uchrashuvda suv toshqini oqibatida zarar ko‘rgan uylar davlat tomonidan bepul ta’mirlab berilishini, uylari zararlangan odamlarning ilgarigi hovlilari ham o‘zlarida qolishini ma’lum qilgan edi. Bundan tashqari, shu kuni suv toshqinidan jabr ko‘rgan 4,5 mingdan ortiq xonadon egalariga 40 million so‘mlik moddiy yordam sertifikati, maishiy texnika to‘plami uchun sertifikat va ichida pul mablag‘i bo‘lgan bank kartochkalari tarqatilishi ma’lum qilindi.
Bosh prokuratura Sardoba falokati yuzasidan jinoyat ishi bo‘yicha 4 ta tergov versiyasini ko‘rib chiqmoqda. Hozirda suv ombori ishi bo‘yicha ikki kishi qamoqqa olingan.
