Ўзбекистон бош вазири ўринбосари Беҳзод Мусаев «Ўзбекистон 24» телеканалига берган интервьюда коронавирусга қарши кураш учун кўрилаётган чоралар ҳозирги вазиятни жиловлашга қанчалик имкон бериши ҳақида гапирди.
Беҳзод Мусаев Тошкент шаҳри мисолида мазкур масала ҳақида ўз фикрини билдирди. Унинг таъкидлашича, бир жойда жамланган 3000 ўринли тақсимлаш марказлари ва 3500 ўринли Зангиота туманидаги юқумли касалликлар шифохонасининг тўлиқ ишга тушиши билан вазиятни жиловлашга имконият яратилади.
Ҳукумат вакилининг айтишича, тақсимлаш марказлари ва Зангиота туманидаги юқумли касалликлар шифохонаси ўртасида ўзаро боғлиқликни таъминлаш ҳамда улар фаолиятини мувофиқлаштириш асосида беморларга биринчи ёрдамдан якуний ёрдамгача беришга имкониятлар яратилмоқда.
Унинг қайд этишича, мазкур икки мажмуанинг тўлиқ ишга тушиши учун вақт талаб қилинади ва шу сабабли карантин чекловлари узайтирилди.
Аввалроқ Беҳзод Мусаев Зангиотадаги юқумли касалликлар шифохонасининг якуний босқичларини ишга тушириш устида иш олиб борилаётгани ва мазкур шифохонада 3500 беморни қабул қилиш режалаштирилаётганини айтганди. Шунингдек, бош вазир ўринбосари Тошкентда ташкил қилинаётган COVID-19 беморларини тақсимлаш марказлари Мудофаа, Ички ишлар вазирликлари ва Давлат хавфсизлик хизмати госпиталларига бириктирилганини маълум қилди.
Эслатиб ўтамиз, Беҳзод Мусаев аввалроқ карантин узайтирилгани учун аҳолидан узр сўраганди.
Изоҳ (0)