Пандемия даврида Ўзбекистондан хорижга кўчиб кетганлар сони маълум қилинди

Коронавирус пандемияси Ўзбекистонга доимий яшаш учун келаётганлар сонини сезиларли даражада камайтирди, деб хабар беради Давлат статистика қўмитаси.

Қайд этилишича, 2020 йил январь–июнь ойларида Ўзбекистонга 577 киши — январь–март ойларида 409 киши, апрель–июнь ойларида 168 киши мамлакатга яшаш учун келган.

Натижада Ўзбекистонда яшаш учун кўчиб келганлар сони 2019 йилнинг шу даврига нисбатан деярли 2,5 баравар камайган. Бу кўрсаткич ўтган йили 1361 кишини ташкил қилган.

Ўзбекистондан йил бошидан бери 4710 киши кетган. Бу 2019 йилнинг шу давридаги кўрсаткичдан атиги 137 кишига камдир.

Статистикага кўра, январь–март ойларида 1906 киши мамлакатни тарк этган. Эътиборли томони пандемия вақтида, яъни апрель–июнь ойларида мамлакатдан 2804 киши хорижда яшаш учун чиқиб кетган.

Таъкидланишича, мамлакатга Қозоғистондан 186 киши, Тожикистондан 145 киши, Россиядан 124 киши, Қирғизистондан 37 киши, Туркманистондан 9 киши ва бошқа давлатлардан 76 киши келган.

Ҳудудлар бўйича бошқа мамлакатлардан Тошкент вилоятига 197 киши, Тошкент шаҳрига 170 киши ва Қорақалпоғистонга 67 киши кўчиб келган.

Бу вақт давомида Ўзбекистондан Қозоғистонга 2770 киши, Россияга 1737 киши, Қирғизистонга 28 киши. Исроилга 37 киши, Тожикистонга 18 киши ва бошқа давлатларга 120 киши кўчиб кетган. Эътиборли жиҳати ўзбекистонликлар кўп кўчиб кетадиган давлатларнинг рўйхатини АҚШ тарк этди.

Вилоятлар кесимида оладиган бўлсак, энг кўп одам Қорақалпоғистондан (1460 киши) хорижга кўчиб кетган. Шунингдек, Тошкент вилояти (1274 киши) ва Тошкент шаҳри ҳам (1132 киши) мамлакатни тарк этганлар сони бўйича етакчилик қилмоқда.