Тошкент шаҳрида коронавирусга гумон қилинган беморларни тақсимлаш ва даволаш учун ташкил қилинган тақсимлаш марказлари Мудофаа, Ички ишлар вазирликлари ва Давлат хавфсизлик хизмати госпиталларига бириктирилди. Бу ҳақда Ўзбекистон бош вазири ўринбосари Беҳзод Мусаев «Ўзбекистон 24» телеканалига берган интервьюда маълум қилди.
Бош вазири ўринбосарининг билдиришича, «Ўзэкспомарказ»нинг 1 ва 2-павильонида ташкил қилинаётган 814 ўринли госпитални бошқариш Мудофаа вазирлиги зиммасига юкланган. «Ёшлик» спорт мажмуасида ташкил қилинаётган 520 ўринли тақсимлаш маркази Давлат хавфсизлик хизмати бошқаруви остида фаолият олиб боради. Гимнастика саройида 750 ўринли марказ ишга туширилади ва Ички ишлар вазирлигига бириктирилади.
Ташкил қилинаётган марказлар тегишли органларнинг госпиталларига бириктирилган ва марказларда госпиталларнинг тиббий ходимлари, шунингдек, Соғлиқни сақлаш тизими шифокорлари фаолият олиб боради.Мазкур марказларни 3 кун ичида ишга тушириш режалаштирилмоқда. Шунингдек, «Ўзэкспомарказ»да аввалроқ ташкил қилинган 1000 ўринли тақсимлаш маркази Тошкент шаҳар ҳокимлиги бошқарувида фаолият олиб бормоқда.
Мавзуга доир: «Ўзэкспомарказ»даги тақсимлаш марказига 300 нафар бемор жойлаштирилган. Марказда жонлантириш бўлими очилиши кутилмоқда
Эслатиб ўтамиз, Президент Шавкат Мирзиёев 27 июль куни Тошкент шаҳрида коронавирус пандемиясига қарши курашиш, бу борадаги ишларнинг самарадорлигини, аҳолига сифатли ва ўз вақтида тиббий ёрдам кўрсатиш қамровини ошириш бўйича олиб борилаётган ишлар ҳисоботини тинглаш чоғида коронавирус билан хасталанган шахсларни самарали даволашга мамлакат ҳарбийлари, ҳарбий-тиббий муассасаларнинг хизматчилари ва тиббиёт мутахассисларини жалб қилиш кераклигини айтганди.
Мавзуга доир: Мудофаа вазирлиги госпиталига ётқизилган 762 беморнинг 660 дан ортиғи ҳарбийлар экани маълум бўлди
Бундан ташқари, Сергели туманидаги болалар ва ўсмирлар спорт мактаби ҳудудида коронавирусга гумон қилинганларга ташхис қўйиш, заруратга кўра даволаш учун шароит яратилган.
Изоҳ (0)