O‘zbekiston bosh vaziri o‘rinbosari Behzod Musayev “O‘zbekiston 24” telekanaliga bergan intervyuda koronavirusga qarshi kurash uchun ko‘rilayotgan choralar hozirgi vaziyatni jilovlashga qanchalik imkon berishi haqida gapirdi.
Behzod Musayev Toshkent shahri misolida mazkur masala haqida o‘z fikrini bildirdi. Uning ta’kidlashicha, bir joyda jamlangan 3000 o‘rinli taqsimlash markazlari va 3500 o‘rinli Zangiota tumanidagi yuqumli kasalliklar shifoxonasining to‘liq ishga tushishi bilan vaziyatni jilovlashga imkoniyat yaratiladi.
Hukumat vakilining aytishicha, taqsimlash markazlari va Zangiota tumanidagi yuqumli kasalliklar shifoxonasi o‘rtasida o‘zaro bog‘liqlikni ta’minlash hamda ular faoliyatini muvofiqlashtirish asosida bemorlarga birinchi yordamdan yakuniy yordamgacha berishga imkoniyatlar yaratilmoqda.
Uning qayd etishicha, mazkur ikki majmuaning to‘liq ishga tushishi uchun vaqt talab qilinadi va shu sababli karantin cheklovlari uzaytirildi.
Avvalroq Behzod Musayev Zangiotadagi yuqumli kasalliklar shifoxonasining yakuniy bosqichlarini ishga tushirish ustida ish olib borilayotgani va mazkur shifoxonada 3500 bemorni qabul qilish rejalashtirilayotganini aytgandi. Shuningdek, bosh vazir o‘rinbosari Toshkentda tashkil qilinayotgan COVID-19 bemorlarini taqsimlash markazlari Mudofaa, Ichki ishlar vazirliklari va Davlat xavfsizlik xizmati gospitallariga biriktirilganini ma’lum qildi.
Eslatib o‘tamiz, Behzod Musayev avvalroq karantin uzaytirilgani uchun aholidan uzr so‘ragandi.
Izoh (0)