Осиё тараққиёт банки Ўзбекистон ҳукуматига коронавирус пандемиясига қарши курашда ёрдам сифатида навбатдаги тиббий воситалар ва анжомлардан иборат юкни етказиб берди. Бу ҳақда ОТБ матбуот хизматига таяниб, «Gazeta.uz» хабар берди.
Маълум қилинишича, 24 июль куни ОТБнинг 1,56 миллион доллар гранти доирасида ЮНИСЕФ орқали харид қилинган 20 та кислород концентраторлари етказиб берилган. Бундан ташқари, Швейцария компанияси билан 19,5 миллион долларга имзоланган иккита шартнома доирасида ўпкани сунъий нафас олдириш аппаратларининг дастлабки 100 таси 17 июль куни Тошкентга олиб келинган. Яна 700 та сунъий нафас олдириш аппаратлари яқин кунларда Ўзбекистонга олиб келинади.
Осиё тараққиёт банки томонидан 1,56 миллион долларлик грант доирасида COVID-19’ни тест қилишга мўлжалланган лаборатория анжомлари 29 июнь куни Санитария-эпидемиология осойишталик агентлигига топширилган эди.
Эслатиб ўтамиз, июнь охирида ОТБ Ўзбекистонга COVID-19 пандемияси даврида иқтисодиётни қўллаб-қувватлаш учун 500 миллион доллар миқдорида кредит беришни маъқуллаганди. Кредит келишуви ҳам имзоланган. Шунингдек, 13 июлда Ўзбекистон ҳукумати ва Жаҳон банки мамлакат қишлоқ хўжалигини модернизация қилиш лойиҳасини амалга ошириш учун умумий қиймати 500 миллион долларлик қарз битимини имзолаган. 14 июлда эса Осиё тараққиёт банки Ўзбекистонда санитария-эпидемиология тизимини модернизация қилишга 200 миллион доллар ажратиши маълум бўлганди.
Изоҳ (0)