Ўзбекистон бўйича 2020 йилнинг январь—июнь ойларида юридик шахс мақомига эга бўлган корхона ва ташкилотларда ишловчиларнинг ўртача ойлик номинал ҳисобланган иш ҳақи 2,5 миллион сўмни ташкил этиб, 2019 йилнинг мос даврига нисбатан 21,6 фоизга ошди. Бу ҳақда Давлат статистика қўмитаси маълум қилди.
Қўмита ҳисоботига кўра, ўртача ойлик номинал ҳисобланган иш ҳақининг республика бўйича ўртача кўрсаткичидан соғлиқни сақлаш ва ижтимоий хизматлар кўрсатиш фаолияти 30,4 фоизга, таълим соҳаси 22,9 фоизга паст бўлган. Шу билан бирга банк, суғурта, лизинг, кредит ва воситачилик фаолияти 13,7 фоизга, ахборот ва алоқа соҳаси 62,2 фоизга республика бўйича ўртача кўрсаткичдан юқорилиги кузатилган.
Иқтисодий фаолиятнинг барча турларида 2019 йилнинг мос даврига нисбатан ўртача ойлик номинал ҳисобланган иш ҳақининг ўсиши кузатилган. Хусусан, банк, суғурта, лизинг ва кредит-воситачилик фаолиятида 33,4 фоизга, ташиш ва сақлаш соҳасида 28,5 фоизга ўсиш қайд этилган.
Таълим соҳаси бўйича ўртача ойлик номинал ҳисобланган иш ҳақи 1,9 миллион сўмни ташкил этиб, 2019 йилнинг мос даврига нисбатан 17 фоизга кўпайган.
Республикадаги ўртача ойлик номинал ҳисобланган иш ҳақига нисбатан сезиларли юқори кўрсаткичлар Тошкент шаҳрида 39,6 фоиз, Сирдарё вилояти 2 фоиз, Тошкент вилоятида 0,2 фоиз ва Қорақалпоғистон Республикасида 0,2 фоизни ташкил қилган.
Шу билан бирга, 10 та ҳудудда ушбу йўналишда ўртача ойлик номинал ҳисобланган иш ҳақининг республика ўртача кўрсаткичидан паст эканлиги кузатилди.
Республикадаги ўртача ойлик иш ҳақига нисбатан сезиларли паст кўрсаткичлар Сурхондарё вилоятида 95,6 фоиз, Хоразм вилоятида 92 фоиз, Фарғона вилоятида 90,9 фоиз ҳамда Қашқадарё вилоятида 88,7 фоизни ташкил этган.
Изоҳ (0)