Kurbanoff.net Telegram-канали 23 июлда кислород концентраторининг нархлари тўғрисида маълумот эълон қилди. Унга кўра, давлат харидлари бўйича электрон дўкон eshop.uzex.uz веб-сайтида кислород концентраторининг нархи 11 ва 30 миллион сўмни, olx.uz веб-сайтида эса 7,7 миллион сўмни ташкил этган. Муаллиф, бироздан сўнг, olx.uz веб-сайтида юқорида кўрсатилган нархда кислород концентратори айни пайтда мавжуд эмаслиги ва давлат харидлари бўйича кўрсатилган нархлар тузилган битимларнинг нархлари эмаслигини кўрсатиб ўтган.
Молия вазирлиги давлат буюртмачилари томонидан кислород концентратори хариди жараёнига изоҳ берди.
«Давлат харидлари тўғрисида»ги қонун талабига кўра, электрон дўкон орқали бир шартнома бўйича базавий ҳисоблаш миқдорининг икки юз эллик бараваридан (бюджет буюртмачилари учун базавий ҳисоблаш миқдорининг йигирма беш бараваридан) ошмайдиган товарлар, бир давлат буюртмачиси учун базавий ҳисоблаш миқдорининг йигирма беш бараваридан ошмайдиган миқдордаги ишлар, хизматлар харид қилиниши мумкин.
Электрон дўконда товарлар (ишлар, хизматлар) тадбиркорлик субъектлари томонидан жойлаштириб борилади ва юқорида қайд этилган суммалардан ортиқ қийматдаги товарларни (ишларни, хизматларни) жойлаштирилишига дастур томонидан чекловлар ўрнатилган.
Бугунги кунда бюджет буюртмачилари 5,6 миллион сўмгача, корпоратив буюртмачилар эса 55,8 миллион сўмгача бўлган қийматдаги товарларни, шунингдек, 5,6 миллион сўмгача бўлган ишлар ва хизматларни электрон дўкон орқали харид қилиши мумкин», – дейилади Молия вазирлиги изоҳида.
Қайд этилишича, қонун ҳужжатларига кўра, махсус ахборот портали автоматик режимда, нархлар сўрови механизмини амалга оширган ҳолда офертани таклиф этган иштирокчига ҳамда электрон дўконда ўхшаш товарларни (ишларни, хизматларни) таклиф этаётган барча иштирокчиларга харид қилиш тартиб-таомилида иштирок этиш тўғрисида таклифлар юборилишини таъминлашга мажбур. Иштирокчилар томонидан берилган нарх бўйича таклифларни таққослаш портал томонидан автоматик режимда амалга оширилади.
«Портал шартномани буюртмачи томонидан танланган иштирокчининг офертасида баён этилган шартларга мувофиқ ҳамда иштирокчилар томонидан таклиф этилган энг паст нархда шакллантиради. Шу нуқтаи назардан, электрон дўконда иштирокчилар товарларни нархини ошириб киритган тақдирда ҳам савдо ғолиби портал томонидан нарх сўрови механизмини амалга оширган ҳолда автоматик тарзда аниқланишини инобатга олсак, шу турдаги товар бўйича энг мақбул (реал) нарх таклиф қилган иштирокчи ғолиб деб топилади. Ўз-ўзидан кўриниб турибдики, нархларни сунъий тарзда ошириб кўрсатган иштирокчи ғолиб бўла олмайди.
Мисол учун, пандемия даврида электрон дўкон орқали бюджет буюртмачиси томонидан бошланғич нархи 5,3 миллион сўмлик кислород концентратори танланган, электрон савдо натижасида 5,0 миллион сўмга (лот рақами 8551108) шартнома тузилган.
Шунингдек, ўтказилган ўрганишлар натижасида кислород концентратори 3,4 миллион сўмдан 23,0 миллион сўмгача (ҚҚС билан) эканлиги, уларни моделлари (қўшимча функциялари мавжудлиги) ва ишлаб чиқилган мамлакатига қараб нархлари ҳар хиллиги аниқланди», – дея қўшимча қилган изоҳда Молия вазирлигининг ахборот хизмати.
Шу билан бирга вазирлик давлат буюртмачилари харид қилиш тартиб-таомиллари турларини танлашда, харидларнинг бошланғич нархларини белгилашда «Давлат харидлари тўғрисида»ги қонуни билан белгиланган асосий принципларга қатъий риоя этишлари ҳамда товарни (ишни, хизматни) сифати ва нархи ўртасидаги мақбул нисбатни таъминлаш орқали харидни амалга оширишлари лозимлигини эслатган.
Президентнинг тегишли қарори билан тасдиқланган рўйхатнинг 13-бандига асосан эпидемияга қарши (шу жумладан ветеринарияга оид) препаратлар, қишлоқ хўжалиги зараркунандаларига қарши курашиш учун кимёвий воситалар, шунингдек, фавқулодда ҳолатларда ваколатли органлар томонидан тасдиқланадиган табиат ҳодисалари, эпидемиялар, касалликлар тарқалишининг олдини олиш ёки унинг оқибатларини бартараф этиш учун бошқа зарур товарларнинг (ишларнинг, хизматларнинг) давлат хариди тўғридан-тўғри шартномалар асосида амалга оширилиши мумкин.
«Мазкур қарорга асосан Бухоро вилояти соғлиқни сақлаш бошқармаси томонидан кислород концентратори 10,1 миллион сўмга 2020 йил 22 июлдаги тўғридан-тўғри тузилган шартнома асосида харид қилинган», – дейилади Молия вазирлиги берган маълумотда.
«Махсус ахборот порталида (Xarid.uz) давлат буюртмачилари томонидан амалга оширилган ва амалга оширилаётган давлат харидлари тўғрисидаги барча маълумотлар, шу жумладан, тўғридан-тўғри шартномалар тўғрисидаги маълумотлар жамоатчилик учун очиқлиги таъминланган. Давлат буюртмачилари харидларни нафақат электрон дўкон харид тури орқали, балки электрон аукцион, танлов (электрон танлов), тендер (электрон тендер) ва ягона етказиб берувчилардан давлат харидлари турлари орқали амалга оширади», – дейилади ахборотда.
Молия вазирлиги томонидан давлат харидлари соҳасига оид бир қатор норматив-ҳуқуқий ҳужжатларга ўзгартириш ва қўшимчалар киритиш орқали давлат харидлари тизимини янада такомиллаштиришга йўналтирилган чоралар кўрилмоқда. Мисол тариқасида, товарларни (ишлар, хизматларни) харид қилишнинг алоҳида тартиби белгиланадиган, стратегик аҳамиятга эга хўжалик жамиятлари ва корхоналарнинг давлат харидлари бўйича эълонлари махсус ахборот порталига жойлаштириши шартлиги, шунингдек, устав фондида (капиталида) стратегик харидорларнинг улуши мавжуд бўлган ташкилотларга Қонун талаблари татбиқ этилиши белгиланган.
Шу билан бирга, «Харид қилиш тартиб-таомилларини ташкил этиш ва ўтказиш тартиби тўғрисида»ги низомга тегишли ўзгартириш ва қўшимчалар киритиш орқали танлов ва тендерларни электрон шаклда ўтказиш тартиби ишлаб чиқилган.
Бунда давлат харидлари тизимини янада ривожлантириш ва харид жараёнларида инсон омилини максимал даражада қисқартириш орқали коррупция аломатларини олдини олиш мақсадида 2020 йилнинг май ойидан бошлаб махсус ахборот портали операторларининг etender.uzex.uz ва tender.mf.uz платформалари орқали танлов ва тендер савдолари электрон шаклда амалга ошириш имкониятлари амалиётга жорий этилган.
Ўзбекистонда давлат харидлари тизими «Давлат харидлари тўғрисида»ги қонун билан тартибга солинган. Ушбу Қонунда харид қилиш тартиб-таомилларининг турлари, мезонлари ва асосий принциплари белгиланган. Молиявий маблағлардан фойдаланишнинг оқилоналиги, тежамкорлиги ва самарадорлиги, очиқлик ва шаффофлик, тортишув ва холислик, коррупцияга йўл қўймаслик давлат харидларининг асосий принциплари жумласидандир.
«Давлат харидлари тўғрисида»ги қонуннинг 23-моддасида харид қилиш тартиб-таомилларини амалга ошириш турлари белгиланган бўлиб, бугунги кунда барча рақобатли харидлар электрон тарзда (инсон омили аралашувисиз) амалга ошириш механизми йўлга қўйилган.
Аввалроқ Бухоро вилоятида коронавирус билан оғриган беморларга ёрдам бериш мақсадида Dynmed компаниясининг ҳар бири 12 миллион сўм турувчи 50 дона тиббиёт контцентраторини сотиб олгани ҳақида хабар берилганди. Telegram’да «Bakiroo» канали юритувчиси Отабек Бакиров Dynmed компаниясининг кислород концентраторлари Alibaba’да 320 доллардан таклиф этилаётганини, агар 100 тадан ортиқ олинса, 220 доллардан сотилаётганини ёзиб қолдирди. Шунингдек, «Troll.uz» каналида ҳам 50 дона концентратор орасидаги фарқ 436 миллион сўм экани танқид қилинган.
Бухоро ҳокими ўринбосари Мирали Ҳамроев давлат ҳокимияти ва бошқаруви органлари томонидан олиб борилаётган ишларга асоссиз хулоса берилаётганини қоралашини билдириб, блогер айтаётган нархда кислород концентратори бор бўлса, харид қилишга тайёрлигини айтган.
«Gazeta.uz» ушбу тиббиёт ускунасининг асл нархи қанча экани ва уни етказиб берувчи тадбиркорлик субъекти ҳақидаги маълумотларни тақдим этди. Кейинчалик Ўзбекистон товар-хом ашё биржаси мазкур масалага ойдинлик киритиш мақсадида қўшимча маълумотларни эълон қилди.
25 июлда Бухоро ҳокимлиги кислород концентраторлари Medtexno trade хусусий корхонасидан харид қилингани ойдинлашди. Бухоро вилоятидаги мутасаддилар D02-8-AM русумли концентраторлари беморни бир дақиқада 8 литргача намланган кислород билан таъминласа, интернет сайтларида эълон қилинган аппаратлар шу вақтда 5 литргача намланган кислород билан таъминлаш қувватига эгалигни таъкидлаган.
Изоҳ (0)