Бухорода Бош прокуратура ҳузуридаги департамент ДХХ ходимлари билан ҳамкорликда ўтказган тадбирда сохта тошлар ҳамда қалбакилаштирилган тарихий-бадиий буюмларни сотишга ихтисослашган жиноий гуруҳ қўлга олинди. Бу ҳақда Бош прокуратура ахборот хизмати раҳбари Ҳаёт Шамсутдинов «Дарё»га маълум қилди.
Хабарда қайд этилишича, ўтказилган тезкор тадбирда Н.Д., Ш.С. ва А.М. А.Д.ни бир дона қора рангли тошни гўёки олмос эканлигига ишонтирган. Гуруҳ мижозга ўша тошни 500 минг АҚШ долларига сотишга келишиб, ундан 4,5 миллиард сўм ва 51 минг АҚШ доллари олаётган пайтда ушланган.
Тадбир давомида жиноий гуруҳнинг яна бир жинояти аниқланган. Улар бир дона зар матодан ишланган камар, бир дона чармдан ишланган ҳамён ва бир дона кумушдан ишланган қўлбола муҳрни Бухоро амирларига тегишли экани, тарихий аҳамиятга эга ноёб буюмлар сирасига киришини айтиб А.Д.ни янада ишонтириш мақсадида тарихий фотосуратларни қалбакилаштириб, буюмларни 100 минг АҚШ долларига сотишга уринган.
Шунингдек, А.М. келгусида фуқароларни ишончига кириб, уларни алдаш йўли билан ноқонуний даромад орттириш мақсадида ўзида сақлаб келаётган 32 турдаги жами 247 дона, турли хилдаги тош ва заргарлик буюмларини ихтиёрий равишда тақдим этган ҳамда ашёвий далиллар процессуал тартибда расмийлаштирилган.
«Мазкур ҳолатлар юзасидан фуқаролар Н.С., Ш.С. ва А.М.га нисбатан Жиноят кодексининг 168-моддаси (Фирибгарлик) 4-қисми «а» банди жиноят иши қўзғатилган ва тергов ҳаракатлари олиб борилмоқда», – дейилади Бош прокуратура ахборот хизматининг хабарида.
Аввал Бухоро вилояти Шофиркон туманида 38 ёшли фуқаро К.Б. 72 миллион сўмга баҳоланган тўққиз бош отни алдов йўли билан сотиб олиб, сотувчини 62 миллион сўмга «ухлатгани» учун унга фирибгарлик айби билан жиноят иши қўзғатилгани, Бухоро шаҳрида жиноий гуруҳ сифатида товламачилик, ўғирлик, фирибгарлик жиноятларини содир этган ва танишларининг пуллари ҳамда буюмларини талон-торож қилган жиноий гуруҳ фаолияти фош қилингани хабар қилинган.
Шунингдек, Бухоро давлат университетига ўқишга киритиб қўйишни ваъда қилиб, бунинг эвазига 4 минг АҚШ доллари пора олишга уринган университет ўқитувчиси қўлга тушгани, Бухоро туманида Telegram ижтимоий тармоғида ногиронлиги бор фуқаро номига гуруҳ ташкил қилиб, унинг даволаниши учун йиғилган эҳсон пулларини ўзлаштирган фирибгарга жиноят иши очилгани ҳақида хабарлар берилган.
Изоҳ (0)