Республика махсус штаби аъзоси 5 ой олдин Ўзбекистонда COVID-19’га қарши курашда қилинган хатоларни таҳлил қилди

Тошкент врачлар малакасини ошириш институти ректори, Коронавирусга қарши курашиш штаби аъзоси, профессор Ҳабибулло Оқилов «Kun.uz» нашрига берган интервьюсида 5 ой аввал Ўзбекистонда коронавирус эпидемияси бошланган вақтга яна қайтиш имкони туғилса Соғлиқни сақлаш тизими ташкилотчиларидан бири сифатида биринчи навбатда қилинадиган ишлар ҳақида сўз юритди.

«Вақтни орқага қайтариш имкони бўлганда, жуда кўп нарса қилса бўларди. Саволингизни тушундим, албатта, қандай хатоларга йўл қўймасдингиз, демоқчисиз.

Ўтган беш ва ҳатто ундан олдинги давр ҳам биз, яъни соғлиқни сақлаш тизими ҳамда коронавирус ўртасидаги ўзига хос пойга даври бўлди, десам хато бўлмайди. Имконим бўлганида, биз нисбатан орқада қолган жиҳатларимизни тўғрилаган бўлардим. Яъни койкалар сонини янада кўпайтирардим, рақамли рентгенлар, пулсоксиметрлар, кислород берувчи мосламаларни катта миқдорда харид қилиш устида ишлардим. Айниқса лаборатория соҳаси, ПЗР тизимларни кўп жойда ташкиллаштириб қўярдим.

Ўша пайтдаям давлат раҳбарининг ўзлари ҳам, ҳукуматимиз ҳам биздан қандай зарурат борлиги ҳақида қайта-қайта сўрадилар. Кўп жиҳатдан тайёргарлик кўриб улгурган бўлсак-да, айрим оқсашлар барибир кузатилди ва бугун шу муаммоларни ечиш устида ишлаяпмиз», – деди республика махсус штаби аъзоси.

Профессор Оқилов 8 июль куни қилган чиқишида Ўзбекистон соғлиқни сақлаш тизимидаги ресурслар «поёнига етгани», бўш койка-ўринлар қолмаганини маълум қилган. 9 июлдаги брифингда эса Оқилов койка-ўринлар, дори захираси мавжудлигини, тизим ҳар қанча беморни қабул қила олишини таъкидлаган. 14 июлда касаллик аломатлари бўлмаганда аҳолини шубҳага кўра, ўзини овутиш учун тест таҳлили топширишга ҳаракат қилмасликка чақирган, шунингдек хусусий тиббиёт муассасаларида коронавирусга тест олишни тақиқлаш бўйича ҳеч қандай кўрсатма йўқлиги, мазкур муассасаларда олинган таҳлиллардаги натижалар мусбат чиқса умумий статистикага қўшилишини қайд этган.