Тайвандаги кирхонанинг 83 ва 84 ёшли эгалари ноодатий хобби билан шуғулланади. Оилавий жуфтлик мижозлар олиб кетишни унутиб қолдирган буюмлар билан суратга тушади, деб хабар беради BBC.
Эр-хотин ушбу кирхонани 70 йилдан буён ишлатиб келади ва бу вақт давомида уларда турли сабабларга кўра қолиб кетган кўплаб кийимлар йиғилиб қолган.
Чол-кампирнинг невараси уларга Instagram’да аккаунт очиш ва қолдириб кетилган буюрлар суратини жойлаб боришни тавсия қилган. Таъкидланишича, у бу ишни интернетда машҳурликка эришиш учун эмас, балки бобоси ва бувисини хурсанд қилиш мақсадида ўйлаб топган.
Бироқ машҳурлик барибир ўз қаҳрамонларини топган: ҳозирда эр-хотиннинг аккаунтини 140 мингга яқин фойдаланувчи кузатмоқда.
«Улар доим ҳам иш билан машғул эмас, баъзида кирхонада уйқусираб ўтиришади ва кайфиятлари ҳам яхши эмас. Мен ушбу суратлар одамларга ўз кийимларини олиб кетишни эслатиб туради ҳамда бобом ва бувимнинг ҳаётини эса бироз қизиқарли қилади деб ўйлаган эдим», — дейди набира.
Чан Ван-Сзининг сўзларига кўра, у «химчистка»ни 14 ёшида очган. Унинг айтишича, у вақтларда инсонлар ўз буюмларини кўпроқ қадрлаган. Сўнгги йиллда эса ёддан чиқиб қоладиган буюмлар кўпайиб кетган.
«Ўтмишда кийим жуда қиммат эди. Уйланганимда костюм учун 20 қоп гуруч беришга мажбур бўлганман. Кийимлар шу қадар қимматбаҳо эдики, уни ломбардга бериб, ўрнига пул олса бўларди», — дея эслайди чол.
Чол-кампир юзлаб буюмларни хайрия ташкилотларига топшириб юборган, бироқ шунга қарамай, уларда ҳалиям жуда кўп кийим-кечаклар сақланиб қолган.
Изоҳ (0)