Tayvandagi kirxonaning 83 va 84 yoshli egalari noodatiy xobbi bilan shug‘ullanadi. Oilaviy juftlik mijozlar olib ketishni unutib qoldirgan buyumlar bilan suratga tushadi, deb xabar beradi BBC.
Chol-kampirning nevarasi ularga Instagram’da akkaunt ochish va qoldirib ketilgan buyurlar suratini joylab borishni tavsiya qilgan. Ta’kidlanishicha, u bu ishni internetda mashhurlikka erishish uchun emas, balki bobosi va buvisini xursand qilish maqsadida o‘ylab topgan.
Biroq mashhurlik baribir o‘z qahramonlarini topgan: hozirda er-xotinning akkauntini 140 mingga yaqin foydalanuvchi kuzatmoqda.
“Ular doim ham ish bilan mashg‘ul emas, ba’zida kirxonada uyqusirab o‘tirishadi va kayfiyatlari ham yaxshi emas. Men ushbu suratlar odamlarga o‘z kiyimlarini olib ketishni eslatib turadi hamda bobom va buvimning hayotini esa biroz qiziqarli qiladi deb o‘ylagan edim”, — deydi nabira.
Chan Van-Szining so‘zlariga ko‘ra, u “ximchistka”ni 14 yoshida ochgan. Uning aytishicha, u vaqtlarda insonlar o‘z buyumlarini ko‘proq qadrlagan. So‘nggi yillda esa yoddan chiqib qoladigan buyumlar ko‘payib ketgan.
“O‘tmishda kiyim juda qimmat edi. Uylanganimda kostyum uchun 20 qop guruch berishga majbur bo‘lganman. Kiyimlar shu qadar qimmatbaho ediki, uni lombardga berib, o‘rniga pul olsa bo‘lardi”, — deya eslaydi chol.
Chol-kampir yuzlab buyumlarni xayriya tashkilotlariga topshirib yuborgan, biroq shunga qaramay, ularda haliyam juda ko‘p kiyim-kechaklar saqlanib qolgan.
Izoh (0)