Шимолий Корея биринчи марта COVID-19’га гумонланиш ҳолати ҳақида хабар берди. Корея Марказий телеграф агентлиги (КМТА) ахборотига кўра, эҳтимолий бемор КХДР чегарасини «ноқонуний кесиб ўтган».
Коронавирусга чалингани гумон қилинаётган бемор Жанубий Корея билан чегарада жойлашган Кэсон шаҳрида аниқланган. Шаҳарда «вайронкор фалокатга сабаб бўлиши мумкин бўлган хавф муносабати билан» Шимолий Корея етакчиси Ким Чен Ин КХДРда ҳукмрон Меҳнат партияси Сиёсий бюросининг фавқулодда йиғилишини ўтказган. Эҳтимолий бемор билан мулоқотда бўлганларнинг бари карантинга олингани айтилмоқда.
Жонс Ҳопкинс университети маълумотларига кўра, дунё бўйича 15,8 миллиондан ортиқ одам коронавирусга чалинган. Шу вақтгача Шимолий Кореядан бошқа барча Шарқий Осиё мамлакатлари ўз ҳудудларида коронавирусга чалиниш ҳолатлари қайд этилгани ҳақида маълум қилган эди.
«Жаҳон соғлиқни сақлаш соҳасидаги инқирозга қарамай, биз зарарли вируснинг тарқалишини тўлиқ бартараф этишга ва эпидемияга қарши барқарор вазиятни сақлаб қолишга муваффақ бўлдик, бу ажойиб муваффақиятдир», — деганди Ким Чен Ин июль ойи бошидаги чиқишида. Унинг сўзларига кўра, Шимолий Корея «партия Марказий қўмитаси бошқарувининг узоқни кўра билиши ва халқнинг юқори даражадаги онглилиги» сабаб шундай натижаларга эришган.
Расман Шимолий Кореяда ҳозирча коронавирусга чалинганлар йўқ. Бироқ Жанубий Кореянинг JoongAng Ilbo газетаси аноним манбаларга асосланиб ёзишича, КХДРда COVID-19 билан боғлиқ илк ҳолатлар 2020 йил февраль ойидаёқ қайд этилган.
Мавзуга доир:
Туркманистонда расман коронавирус бўлмаса-да, июль ойи ўрталаридан бошлаб коронавирусга қарши курашаётган мамлакатлардагига ўхшаш чеклов чоралари ўрнатила бошланди. Хусусан, мамлакатда масжидлар, зиёратгоҳлар ва черковлар ёпилди. Бундан ташқари, Туркманистон Соғлиқни сақлаш вазирлиги аҳолига ҳимоя ниқоблари тақиш ва ўзаро камида бир метр масофа сақлаш ҳақида тавсиялар берди, бироқ расман бу тавсиялар коронавирус тарқалиши хавфи сабабли эмас, балки ҳаводаги чанг миқдори ошиши эҳтимоли сабаб берилган.
Изоҳ (0)