Kim Chen In nima uchun Shimoliy Koreyada koronavirus yo‘qligini izohladi
Shimoliy Koreya xalqining va Mehnat partiyasi Markaziy qo‘mitasining hamjihatligi sharofati bilan koronavirus infeksiyasi mamlakat hududida tarqalmadi. Bu haqda KXDR yetakchisi Kim Chen Inga tayanib, “RBK” xabar berdi.
2-iyul kuni Kim Chen In KXDR Mehnat partiyasi Markaziy qo‘mitasining kengaytirilgan yig‘ilishida ishtirok etib, hukmron partiyaning Markaziy qo‘mitasini uzoqni ko‘ra bilishi va butun xalqning ongli ravishda birdamligi Shimoliy Koreyada COVID-19’ning tarqalmasligiga sabab bo‘lganini ta’kidlagan.
Kim Chen In so‘nggi yarim yilda mamlakatda epidemiologik holat bo‘yicha amalga oshirilgan ishlarni tahlil qilib, sog‘liqni saqlash sohasidagi jahon inqiroziga qaramay, Shimoliy Koreya virusning o‘z hududiga kirishini to‘liq to‘sib qo‘yganini ma’lum qildi.
Shimoliy Koreya hukumatining rasmiy ma’lumotlariga ko‘ra, mamlakatda koronavirus infeksiyasi bilan kasallanish bo‘yicha birorta ham holat qayd etilmagan. Mart oyida esa Janubiy Koreyaning JoongAng Ilbo nashri o‘z manbasiga tayanib, KXDR koronavirus bilan kasallanish bo‘yicha birinchi holat qayd etilganini yozgandi.
Eslatib o‘tamiz, Shimoliy Koreya pandemiya sabab fevral oyidayoq Rossiya bilan temiryo‘l qatnovlarini uzib qo‘ygan edi. AQSh davlat kotibi Maykl Pompeo KXDRda koronavirus tarqalishi va ocharchilik boshlanishini prognoz qilgandi. May oyining o‘rtalarida koronavirus rasman aniqlanmagan KXDR epidemiyaga qarshi kurash uchun yordam qabul qilishni boshlagan, oradan ko‘p o‘tmay mamlakatda xorijliklar uchun joriy qilingan bir qator cheklovlar olib tashlanishi ma’lum bo‘lgandi.
