Ўзбекистон Президенти Шавкат Мирзиёев ва Туркия президенти Ражаб Тоййиб Эрдўғон телефон орқали мулоқот қилди, деб хабар беради Президент матбуот хизмати.
Мулоқот давомида Туркия етакчиси Ўзбекистон раҳбарининг туғилган куни билан самимий муборакбод этган.
Қайд этилишича, суҳбатда икки томонлама муносабатлар ва минтақавий ҳамкорликнинг долзарб масалалари юзасидан фикр алмашилди. Давлат раҳбарлари 2020 йил февраль ойида Анқара шаҳрида ўтган олий даражадаги учрашувда эришилган келишувларни кенг кўламли амалга ошириш муҳимлигини қайд этди.
Савдо-иқтисодий ва инвестицион ҳамкорлик бўйича қўшма лойиҳаларни ишлаб чиқиш ва амалга оширишни жадаллаштириш мақсадида ўтказиладиган ҳукуматлараро мулоқотларга муҳим эътибор қаратилди.
Шавкат Мирзиёев Туркия етакчисига пандемияга қарши курашда кўрсатилаётган кўмак учун миннатдорчилик билдирди.
Аввалроқ Туркиядан Ўзбекистонга коронавирусга қарши курашда ёрдам бериш учун мутахассислар келгани ҳақида хабар берилган эди.
Изоҳ (0)